راجیو گاندھی سینٹر فار ڈائبٹیز میں عالمی یوم ذیابیطس منایا گیا

علی گڑھ، 15 نومبر (ہ س)۔ جواہر لعل نہرو میڈیکل کالج کے راجیو گاندھی سینٹر فار ڈائبٹیز اینڈ اینڈوکرائنولوجی میں عالمی یوم ذیابیطس (ڈائبٹیز) صحت آگاہی، تعاون اور خصوصاً ٹائپ 1 ذیابیطس کے مریضوں کی فلاح کے مقصد سے مختلف سرگرمیوں کے ساتھ منایا گیا۔ پروگرام کے تحت مریضوں میں تقریباً ایک سو گلوکومیٹر تقسیم کیے گئے تاکہ وہ باقاعدہ شوگر مانیٹرنگ کر سکیں اور اپنی صحت بہتر طور پر منظم کر سکیں۔ شرکاء کی معلومات میں اضافے کے لیے ایک دلچسپ کوئز مقابلہ بھی منعقد ہوا، جس کے فاتحین کو خصوصی انعامات دیے گئے۔

ڈین فیکلٹی آف میڈیسن، پروفیسر محمد خالد نے اپنے کلیدی خطاب میں بلڈ گلوکوز کی باقاعدہ نگرانی، محتاط ڈائبٹیز مینجمنٹ اور مثبت سوچ کے ساتھ زندگی گزارنے کی اہمیت پر زور دیا۔ جے این ایم سی کے پرنسپل اور چیف میڈیکل سپرنٹنڈنٹ، پروفیسر امجد علی رضوی نے ذیابیطس سے متعلق رہنمائی فراہم کرتے ہوئے نظم و ضبط اور ماہرین کے مشوروں پر عمل کی اہمیت کو اجاگر کیا۔

مرکز کے ڈائریکٹر، پروفیسر شِیلو شفیق صدیقی نے مہمانوں کا استقبال کیا اور دن کے پروگراموں کا تعارفی خاکہ پیش کیا۔ ڈاکٹر احمد عالم نے پروگرام کی نظامت اور گفٹس و گلوکومیٹر کی تقسیم کی ذمہ داری نبھائی۔ اختتام پر پروفیسر حامد اشرف نے شکریہ ادا کیا۔

ہندوستھان سماچار

---------------

ہندوستان سماچار / سید کامران علی گڑھ