جموں،15 نومبر (ہ س)۔

جموں رِنگ روڈ پرتھوی پور، میران صاحب کے قریب ایک شخص کو جلتی حالت میں ملنے کے معاملے میں پولیس نے اہم پیش رفت کرتے ہوئے تین ملازمین کو گرفتار کر لیا ہے، جبکہ تفتیش مختلف پہلوؤں پر جاری ہے۔دس نومبر کی صبح یہ اطلاع ملی کہ پران چند، عمر تقریباً پچپن برس سکنہ وارڈ نمبر دو آر ایس پورہ، کھلے میدان میں جھلسے ہوئے پائے گئے۔ پولیس نے موقع پر پہنچ کر مقامی لوگوں کے ساتھ آگ پر قابو پایا اور زخمی شخص کو علاج کے لیے جی ایم سی جموں منتقل کیا، جہاں وہ زخموں کی تاب نہ لاتے ہوئے دم توڑ گئے۔ متوفی محکمہ آبپاشی میں ہیلپر کے طور پر تعینات تھا۔

واقعہ کے فوراً بعد تھانہ میران صاحب میں متعلقہ دفعات کے تحت مقدمہ درج کیا گیا اور ایس ایچ او میران صاحب کی سربراہی میں تفتیش کا آغاز کیا گیا۔ فارنسک ماہرین نے موقع کا معائنہ کرکے ضروری شواہد جمع کیے۔ تحقیقات کے دوران حاصل شدہ شواہد، گواہوں کے بیانات اور مختلف ویڈیوز سے یہ پہلو سامنے آیا کہ متوفی مسلسل ذہنی دباؤ کا شکار تھا، جبکہ اس کی تنخواہ بھی کئی ماہ سے روکی گئی تھی، جس کے باعث اس نے مبینہ طور پر انتہائی قدم اٹھایا۔ پولیس نے تفتیش کے دوران محکمہ آبپاشی کے تین ملازمین کو حراست میں لیا ہے، جن کی شناخت سریجیت کمار، گردھاری لال اور رام مورتی عرف سانی کے طور پر ہوئی ہے۔پولیس کے مطابق تفتیش اب بھی جاری ہے اور مزید حقائق سامنے آنے کی توقع ہے۔

ہندوستھان سماچار

ہندوستان سماچار / محمد اصغر