نئی دہلی، 10 نومبر (ہ س)۔ بہار اسمبلی انتخابات کے دوسرے اور آخری مرحلے کے ساتھ سات ریاستوں اور مرکز کے زیر انتظام علاقوں کی آٹھ نشستوں پر ضمنی انتخابات کے لیے منگل کو ووٹنگ ہوگی۔ ان میں جھارکھنڈ، راجستھان، اڈیشہ، تلنگانہ، پنجاب اور میزورم کی ایک ایک نشست اور جموں و کشمیر کی دو نشستیں شامل ہیں۔ بہار اسمبلی انتخابات کے ساتھ ہی ووٹوں کی گنتی 14 نومبر کو ہوگی۔ الیکشن کمیشن کے مطابق یہ ضمنی انتخابات ارکان کے استعفے، انتقال یا نااہلی سے خالی ہونے والی نشستوں کو پر کرنے کے لیے کرائے جا رہے ہیں۔ ان تمام حلقوں میں ووٹنگ کی تمام تیاریاں مکمل کر لی گئی ہیں۔ الیکشن کمیشن نے کہا کہ تمام پولنگ اسٹیشنوں پر ای وی ایم اور وی وی پی اے ٹی مشینیں لگائی گئی ہیں۔ ووٹرز کو اپنا ووٹر شناختی کارڈ دکھانا ہوگا۔ تمام اسٹرانگ رومز میں سی سی ٹی وی کیمرے فعال ہیں، اور کسی بھی بے ضابطگی کی اطلاع پر فوری طور پر توجہ دی جائے گی۔ مرکز کے زیر انتظام جموں و کشمیر کی دو سیٹوں: بڈگام اور نگروٹہ میں ووٹنگ ہوگی۔ بڈگام میں نیشنل کانفرنس (این سی) کے امیدوار آغا محمود کا مقابلہ پی ڈی پی امیدوار آغا سید منتظر مہدی اور عام آدمی پارٹی کی دیبا خان سے ہے۔ یہ سیٹ عمر عبداللہ کے استعفیٰ کے بعد خالی ہوئی تھی، جنہوں نے گاندربل سیٹ برقرار رکھی تھی۔ نگروٹہ میں اصل مقابلہ این سی کی شمیم بیگم اور بی جے پی کی دیویانی رانی کے درمیان ہے۔ کانگریس نے این سی کے حق میں اپنا امیدوار واپس لے لیا ہے۔ سابق ایم ایل اے دیویندر سنگھ رانا کے انتقال کے بعد اس سیٹ پر بی جے پی کو نقصان اٹھانا پڑا۔ عام آدمی پارٹی نے یہاں جوگندر سنگھ کو میدان میں اتارا ہے۔ راجستھان کی انت اسمبلی سیٹ پر کانگریس اور بی جے پی کے درمیان سیدھا مقابلہ ہے۔ کانگریس نے سابق وزیر پرمود جین بھیا کو میدان میں اتارا ہے، جب کہ مورپال سمن بی جے پی کو چیلنج دے رہے ہیں۔ یہ سیٹ بی جے پی کے ایم ایل اے کنور لال مینا کے نااہل ہونے کے بعد خالی ہوئی تھی۔ انت کے پاس تقریباً 2.38 لاکھ رجسٹرڈ ووٹر ہیں۔ یہ مقابلہ وزیر اعلی بھجن لال شرما اور ریاستی کانگریس صدر گووند سنگھ دوٹاسرا کے وقار سے بھی جڑا سمجھا جاتا ہے۔ جھارکھنڈ کے گھاٹسیلا اسمبلی حلقہ میں، مہاگٹھ بندھن کے امیدوار سومیش چندر سورین کا مقابلہ بی جے پی کے حمایت یافتہ بابولال سورین سے ہے، جو سابق وزیر اعلی چمپائی سورین کے بیٹے ہیں۔ اس ضمنی انتخاب میں جھارکھنڈ مکتی مورچہ (جے ایم ایم) اور بی جے پی کے درمیان سخت مقابلہ ہونے کی امید ہے۔ گھاٹسیلا میں تقریباً 1.96 لاکھ ووٹر ہیں، جن میں دیہی اور قبائلی ووٹ فیصلہ کن کردار ادا کرتے ہیں۔ اڈیشہ کی نواپاڑا سیٹ پر بی جے پی کے جئے ڈھولکیا، بی جے ڈی کی سنیہانگینی چھوریا اور کانگریس کے گھاسیرام ماجھی آمنے سامنے ہیں۔ ریاست میں حکومت مخالف لہر اور مقامی مسائل دونوں اس ضمنی انتخاب کو دلچسپ بنا رہے ہیں۔ نواپاڑا میں 2.12 لاکھ ووٹر ہیں، اور سیکورٹی کے سخت انتظامات کیے گئے ہیں۔ حیدرآباد کی باوقار جوبلی ہلز سیٹ پر، بی آر ایس کی سنیتا (سابق ایم ایل اے گوپی ناتھ کی بیوہ)، کانگریس کے پسماندہ طبقے کے لیڈر نوین یادو، اور بی جے پی امیدوار لنکلا دیپک ریڈی کے درمیان سہ رخی مقابلہ ہے۔ انتخابی مہم کے دوران بی آر ایس اور کانگریس قائدین کے درمیان سخت الفاظ کا تبادلہ ہوا۔ عام آدمی پارٹی کے ایم ایل اے کشمیر سنگھ سوہل کے انتقال کے بعد پنجاب کی ترن تارن سیٹ پر ضمنی انتخاب ہو رہا ہے۔ اس سیٹ پر بی جے پی کے ہرجیت سنگھ سندھو، کانگریس کے کرنبیر سنگھ برج اور اے اے پی کے ہرمیت سنگھ سندھو کے درمیان سہ رخی مقابلہ ہے۔ یہ سیٹ سرحدی علاقے میں آتی ہے، جہاں تقریباً 1.75 لاکھ ووٹرز ہیں۔ میزورم کی ڈمپا سیٹ پر بی جے پی کے لالہمنگتھنگا سائیلو، کانگریس کے جان روٹلوانگلیانا، میزو نیشنل فرنٹ کے آر لالتھنگلیانا اور زیڈ پی ایم کے وانللا سائیلو کے درمیان کثیر الجہتی مقابلہ دیکھنے کو مل رہا ہے۔
---------------
ہندوستان سماچار / عبدالسلام صدیقی
