جموں, 9 اکتوبر (ہ س)۔ جموں و کشمیر کی ریاستی حیثیت کی بحالی سے متعلق درخواستوں پر سپریم کورٹ جمعہ کے روز سماعت کرے گی۔ یہ معاملہ چیف جسٹس آف انڈیا کی سربراہی والی بینچ کے روبرو فہرست میں سلسلہ نمبر 17 پر درج ہے۔

ایڈوکیٹ صہیب قریشی کے مطابق، ’یہ کیس 10 اکتوبر کو چیف جسٹس آف انڈیا کی سربراہی والی بینچ کے سامنے سماعت کے لیے مقرر کیا گیا ہے۔انہوں نے مزید کہا کہ مرکزی حکومت کی جانب سے اب تک اس معاملے پر کوئی جواب داخل نہیں کیا گیا ہے۔

یاد رہے کہ 14 اگست کو عدالت عظمیٰ میں ریاستی درجہ بحال کرنے سے متعلق ایک درخواست کی سماعت کے دوران عدالت نے مشاہدہ کیا تھا کہ زمینی حقائق کو نظرانداز نہیں کیا جا سکتا اور پہلگام حملے جیسے واقعات کو بھی پیش نظر رکھنا ضروری ہے۔

چیف جسٹس بی آر گوائی اور جسٹس کے ونود چندرن پر مشتمل بینچ نے کہا تھا کہ آپ کو زمینی صورتحال کو بھی مدنظر رکھنا ہوگا، پہلگام میں جو ہوا اُسے نظرانداز نہیں کیا جا سکتا۔

درخواست گزاروں نے دلیل دی ہے کہ ریاستی درجہ بحال کرنے میں تاخیر وفاقیت کے اصول کی خلاف ورزی ہے جو آئین کے بنیادی ڈھانچے کا حصہ ہے۔

ان کا یہ بھی کہنا ہے کہ عدالت عظمیٰ کے دسمبر 2023 کے فیصلے میں جس میں کہا گیا تھا کہ ریاستی درجہ جلد از جلد بحال کیا جائے، اس پر عمل درآمد کے لیے نہ کوئی واضح ٹائم لائن دی گئی ہے اور نہ ہی کوئی عملی قدم اٹھایا گیا ہے۔

ہندوستھان سماچار

---------------

ہندوستان سماچار / محمد اصغر