نئی دہلی، 9 اکتوبر (ہ س)۔

کنفیڈریشن آف آل انڈیا ٹریڈرز (سی اے آئی ٹی) نے کروا چوتھ پر 25,000 کروڑ روپے کے ملک گیر کاروبار کا تخمینہ لگایا ہے۔ ان کا کہنا تھا کہ پورے ملک میں تہوار کا ماحول ہے، جو دیوالی تک جاری رہتا ہے۔ کروا چوتھ ہمیں یہ پیغام دیتا ہے کہ سچی محبت صرف قربانی میں ہی نہیں بلکہ برابری اور باہمی احترام میں بھی ہے۔ جب میاں بیوی دونوں ایک دوسرے کی بھلائی کے لیے برت رکھیں تب ہی یہ تہوار اپنی حقیقی اور بہترین شکل میں منایا جا سکتا ہے۔

چاندنی چوک کے ایم پی اور سی اے آئی ٹی کے قومی جنرل سکریٹری پروین کھنڈیلوال نے جمعرات کو ملک بھر کے لوگوں خصوصاً تاجروں سے اپیل کی کہ وہ اپنی بیویوں کے اعزاز میں کروا چوتھ کابرت رکھیں۔ انہوں نے کہا کہ وہ خود بھی بیس سال سے زیادہ عرصے سے کروا چوتھ کا برت رکھتے ہیں۔ انہوں نے کہا کہ جس طرح خواتین اپنے شوہروں کی لمبی عمر کے لیے برت رکھتی ہیں اسی طرح مردوں کو بھی اپنی بیویوں کی صحت، لمبی عمر اور خوشی کے لیے برت رکھنا چاہیے۔

سی اے آئی ٹی جنرل سکریٹری نے کہا کہ 10 اکتوبر کو کروا چوتھ کے بڑے تہوار کے پیش نظر دہلی اور ملک کے بازاروں میں تاجروں نے بڑے پیمانے پر تیاریاں کی ہیں۔ کروا چوتھ کی اہم اشیاء میں پوجا تھالی، رولی اور چاول رکھنے کے لیے چھوٹے پیالے، چاند کو پانی چڑھانے کے لیے لوٹا یا گلاس، اور چاند دیکھنے کے لیے خواتین کے لیے چھلنی شامل ہیں۔ یہ تمام اشیاء سونے، چاندی، پیتل، سٹینلیس سٹیل یا کانسی سے بنی ہیں۔ ہندوستان میں بنی یہ اشیاء پورے ملک میں استعمال ہوں گی، جب کہ اس سے قبل یہ اشیاء زیادہ تر چین میں بنتی تھیں۔

ہندوستھان سماچار

ہندوستان سماچار / عطاءاللہ