کولکاتہ، 8 اکتوبر (ہ س) ۔

بی جے پی کارکنوں کے ذریعہ ترنمول کانگریس (ٹی ایم سی) کے اگرتلہ دفتر کی مبینہ توڑ پھوڑ کے بعد، ایک سینئر ٹیم تریپورہ کے لئے روانہ ہوگئی ہے۔ اس کی قیادت لوک سبھا ایم پی پرتیما منڈل کر رہی ہیں۔

ٹی ایم سی کی ٹیم میں ایم پی سیانی گھوش اور بیرباہا ہنسدا کے علاوہ پارٹی کے ترجمان کنال گھوش اور سدیپ راہا شامل ہیں۔ راجیہ سبھا کی رکن سشمیتا دیو کے بھی اگرتلہ میں ٹیم میں شامل ہونے کی امید ہے۔

ٹی ایم سی کے قومی جنرل سکریٹری اور ایم پی ابھیشیک بنرجی نے بی جے پی پر الزام لگایا کہ وہ اپنی مشینری کا استعمال ریاستوں میں تشدد بھڑکانے کے لیے کر رہی ہے جہاں وہ اقتدار میں ہے۔ انہوں نے کہا، انتخابات کے ذریعے بنگال میں ہمیں شکست دینے میں ناکامی کے بعد، بی جے پی اپنی طاقت کا مظاہرہ کرنے کے لیے ان ریاستوں میں بدامنی پھیلانے کی کوشش کر رہی ہے جہاں وہ اقتدار میں ہے ۔ رکن پارلیمنٹ نے تریپورہ کے واقعہ کو ”انتقام اور لاقانونیت“ کی مثال قرار دیا۔

مغربی بنگال کی وزیر اعلیٰ ممتا بنرجی کے بھتیجے ابھیشیک بنرجی نے کہا کہ یہ حملہ ٹی ایم سی لیڈروں اور کارکنوں کے خلاف جاری حملوں کے سلسلے کا حصہ ہے۔ انہوں نے یاد دلایا کہ 2021 میں، میرے تریپورہ کے دورے کے دوران میرے قافلے پر بی جے پی کے مقرر کردہ غنڈوں نے حملہ کیا تھا۔ وہ جمہوریت کی بات کرتے ہیں لیکن ان کے اقدامات اس کے بنیادی اصولوں کی خلاف ورزی کرتے ہیں۔

ٹی ایم سی ٹیم کا مقصد تریپورہ کی صورتحال کا جائزہ لینا، متاثرہ کارکنوں کو مدد فراہم کرنا، اور باضابطہ طور پر ریاستی انتظامیہ کے ساتھ معاملہ اٹھانا ہے۔ ابھیشیک بنرجی نے کہا، دھمکیاں، تشدد اور انتقامی کارروائیاں ہمیں کبھی خاموش نہیں کر پائیں گی۔ جمہوریت اور عوام کی مرضی ہمیشہ سیاست پر غالب رہے گی۔

ہندوستھان سماچار

ہندوستان سماچار / عطاءاللہ