جموں, 7 اکتوبر (ہ س)۔ کمشنر جموں میونسپل کارپوریشن (جے ایم سی) ڈاکٹر دیوانش یادو کی ہدایت پر، جوائنٹ کمشنر (ریگولیشن اینڈ انفورسمنٹ) سُباہ مہتا اور ڈپٹی کمشنر (ساوتھ) جے ایم سی لعل چند کی نگرانی میں، جے ایم سی کی انفورسمنٹ وِنگ نے غیر قانونی تعمیرات کے خلاف ایک مؤثر انہدامی کارروائی انجام دی۔ اس کارروائی کا مقصد شہر میں منظم، محفوظ اور قانون کے مطابق شہری ترقی کو یقینی بنانا تھا۔

ترجمان کے مطابق، کارروائی کے دوران وارڈ نمبر 68 کے اپر جالو چک۔گریٹر کیلاش علاقے میں دو غیر قانونی تعمیر شدہ ڈھانچوں کو منہدم کیا گیا۔ یہ تعمیرات مقررہ بلڈنگ بائی لاز اور تعمیراتی ضوابط کی کھلی خلاف ورزی میں کی گئی تھیں۔

اسی سلسلے میں جے ایم سی انفورسمنٹ ٹیم نے بنتلاب علاقے میں ایک اور غیر مجاز عمارت کو بھی منہدم کیا۔

جموں میونسپل کارپوریشن نے عوام سے اپیل کی ہے کہ وہ شہر کی حدود میں تعمیرات کے لیے قانونی تقاضوں اور قواعد و ضوابط کی مکمل پاسداری کریں۔ شہریوں سے کہا گیا ہے کہ کسی بھی قسم کی غیر مجاز تعمیر سے اجتناب کریں اور تعمیراتی کام شروع کرنے سے قبل باقاعدہ اجازت نامہ حاصل کریں۔

جوائنٹ کمشنر (ریگولیشن اینڈ انفورسمنٹ) نے کہا کہ جموں میونسپل کارپوریشن شہر کی منظم اور پائیدار ترقی کے لیے پرعزم ہے اور غیر قانونی تعمیرات کے خلاف سخت کارروائی بلا امتیاز جاری رہے گی۔ ہم شہریوں سے اپیل کرتے ہیں کہ وہ قانونی طریقہ کار پر عمل کریں تاکہ محفوظ اور منصوبہ بند شہری ترقی کو فروغ دیا جا سکے۔

انہوں نے مزید کہا کہ غیر قانونی تعمیرات اور تجاوزات کے خاتمے کے لیے اس نوعیت کی مہمات جموں کے تمام علاقوں میں جاری رہیں گی۔

اس انہدامی کارروائی کے دوران انفورسمنٹ آفیسر، انفورسمنٹ انسپکٹرز اور دیگر فیلڈ اہلکار موقع پر موجود تھے۔

ہندوستھان سماچار

---------------

ہندوستان سماچار / محمد اصغر