حیدرآباد، 7 اکتوبر(ہ س)۔ حالیہ آر ٹی سی کرایوں میں اضافہ کے خلاف احتجاج کرتے ہوئے بی آرایس کے رکن اسمبلی ڈی سدھیر ریڈی، کے وینکٹیش اورایم گوپال نے منگل کو نامپلی نمائش گراؤنڈ سے اسمبلی تک آرٹی سی بس میں سفر کیا۔ انہوں نے مطالبہ کیا کہ حکومت فوراً اپنے اس فیصلہ کو واپس لے، جس کا اثر مسافروں پرمنفی پڑاہے۔کانگریس حکومت کے خلاف نعرے لگاتے ہوئے ارکان اسمبلی نے یہ سفر مسافروں کے بوجھ کو محسوس کرنے اور ان سے براہِ راست رائے لینے کے لئے کیا۔مسافروں سے بات چیت کے دوران کئی افراد نے کرایہ میں اضافہ پر برہمی ظاہر کی اور کہا کہ اس اضافہ سے روزانہ کے مسافروں پر ہرماہ 400 سے 500 روپے اضافی لاگت آئے گی۔ کئی افراد نے حکومت پر الزام لگایا کہ وہ غریب عوام پر بوجھ ڈال رہی ہے۔اسمبلی کے قریب اترنے کے بعد، بی آر ایس کے قائدین نے صحافیوں سے بات کرتے ہوئے کہاکہ کانگریس حکومت غریب مخالف ثابت ہوئی ہے اور اس کی مختلف بڑھتی ہوئی پالیسیوں میں گاڑیوں کا ٹیکس، شراب کی قیمتیں اورطلبہ کے بس پاس شامل ہیں۔ انہوں نے کہاکہ آرٹی سی کرایوں میں اضافہ مسافروں اور آر ٹی سی دونوں کے لئے مالی بحران پیدا کرسکتا ہے۔ ہندوستھان سماچار

ہندوستان سماچار / محمدعبدالخالق