حیدرآباد, 7۔ اکتوبر۔(ہ س)۔بی آر ایس کے کارگزارصدر کے ٹی راما راؤ نے سپریم کورٹ کے اندر چیف جسٹس آف انڈیا بی آر گوائی پر ہوئے حملہ کی سخت مذمت کی اور اسے ملک میں بڑھتی ہوئی عدم برداشت کی تشویشناک علامت قراردیا۔انہوں نے کہا کہ ملک میں عدم برداشت اپنی انتہا پرپہنچ چکی ہے۔کے ٹی آرنے اس واقعہ کو عدالتی وقار پر شرمناک حملہ قرار دیتے ہوئے کہاکہ یہ صرف ایک فرد پرحملہ نہیں بلکہ خود عدالتی نظام پرحملہ ہے۔انہوں نے خبردار کرتے ہوئے کہاکہ کسی بھی اختلاف رائے، چاہے وہ عقیدہ جیسے حساس مسائل پرہی کیوں نہ ہو،تشدد کوجائز نہیں ٹھہراتا۔ ایسا رویہ جمہوریت کی بنیاد کو خطرے میں ڈال دیتا ہے۔سابق وزیرورکن اسمبلی ٹی ہریش راؤنے بھی چیف جسٹس پر حملے کی مذمت کی اور اسے شرمناک قرار دیا۔ انہوں نے مطالبہ کیا کہ حملہ آور کو فوری طورپر انصاف کے کٹہرے میں لایا جائے۔ ہندوستھان سماچار

ہندوستان سماچار / محمدعبدالخالق