تلنگانہ آر ٹی سی بس کرایوں میں اضافہ، کارپوریشن کو روزانہ تقریباً 2.4 کروڑ کی اضافی آمدنی

حیدرآباد، 6 اکتوبر (ہ س)۔ جڑواں شہروں حیدرآباد و سکندرآباد میں آرٹی سی بس کرایوں میں اضافہ ہوگیا ہے جس کا اعلان کارپوریشن کی جانب سے کیا گیا تھا۔ اس اضافہ کے نتیجہ میں آر ٹی سی کو روزانہ تقریباً 2.4 کروڑ روپے کی اضافی آمدنی ہونے کی توقع ہے۔

میٹرو ڈیلکس اور ای میٹرو اے سی بسوں میں ابتدائی تین مراحل تک کرایہ میں 5 روپے اورچوتھے مرحلہ سے 10روپے کااضافہ کیا گیا ہے۔ آرڈینری بسوں میں کم ازکم کرایہ 15 روپے اور زیادہ سے زیادہ 50 روپے مقرر کیا گیا ہے۔ میٹروایکسپریس بسوں میں کم از کم کرایہ 15 روپے اورزیادہ سے زیادہ 60 روپے ہے۔ ای میٹروایکسپریس اورمیٹروڈیلکس بسوں میں کم ازکم کرایہ 15روپے جبکہ زیادہ سے زیادہ 70روپے تک رکھا گیا ہے۔ ای میٹرواے سی بسوں میں کم ازکم کرایہ 20 روپے اورزیادہ سے زیادہ 90 روپے تک بڑھ گیا ہے۔

واضح ہو کہ دونوں شہروں میں اس وقت 2,931 بسیں چل رہی ہیں جوروزانہ 31,815 ٹرپس مکمل کرتی ہیں۔ ان بسوں میں روزانہ تقریباً 26 لاکھ مسافرسفر کرتے ہیں جن میں سے 70 فیصد یعنی تقریباً 18 لاکھ افراد مہالکشمی اسکیم کے تحت مفت سفرکررہے ہیں۔ مختلف اقسام کے بس پاس استعمال کرنے والے مسافروں کی تعداد 2.7 لاکھ ہے۔

ہندوستھان سماچار

ہندوستان سماچار / محمدعبدالخالق