موسیٰ ندی ترقیاتی پروجیکٹ پر دسمبر سے عمل آوری کی جائے، وزیراعلی کی ہدایتحیدرآباد، 6 اکتوبر (ہ س)۔ وزیراعلی ریونت ریڈی نے عہدیداروں کو ہدایت دی ہے کہ موسیٰ ندی ترقیاتی منصوبہ پر دسمبر سے عمل آوری کا آغاز کیا جائے۔ وزیراعلی نے موسیٰ ندی ترقیاتی پروجیکٹ کے پہلے مرحلہ کے کاموں کاعہدیداروں کے ساتھ اجلاس میں جائزہ لیا۔ پہلے مرحلہ کے کاموں کیلئے 5641 کروڑ کی ضرورت پڑے گی اور 493 ایکڑ اراضی کوترقی دی جاسکتی ہے۔ پروجیکٹ کی تکمیل کیلئے حکومت نے زیادہ ترانحصار قرض پرکیا ہے اور دیگر وسائل کے ذریعہ بھی فنڈس اکٹھا کئے جائیں گے۔ واضح ہو کہ ایشین ڈیولپمنٹ بینک نے پروجیکٹ کیلئے 4100 کروڑ کی اجرائی سے اصولی اتفاق کیا ہے۔ ریاستی حکومت 1541 کروڑ کاانتظام کرے گی اورباقی رقم مالیاتی اداروں سے حاصل کی جاسکتی ہے۔ موسیٰ ندی ترقیاتی منصوبہ کا مقصد ندی کو پاک وصاف کرکے پانی کے بہاؤ کویقینی بناناہے۔ موسیٰ ندی کی ترقی کے نتیجہ میں اطراف کے علاقوں میں سیلاب کی صورتحال پر قابو پایا جا سکتا ہے۔ حکام نے پہلے مرحلہ میں 493 ایکڑ اراضی کی ضرورت ظاہرکی جس میں 340 ایکڑ اراضی خانگی پٹہ داروں اور153 ایکڑ اراضی سرکاری اداروں کی ہے۔ حکومت نے پروجیکٹ کے تحت پہلے مرحلہ میں عثمان ساگر تابا پوگھاٹ 11 کیلومیٹرکوترقی دینے کا منصوبہ بنایاہے۔ پہلے مرحلہ کے دوجزوی پروجیکٹس رہیں گے اور فیس I اےکے تحت 9.5 کیلومیٹرکا احاطہ کیا جائے گا جو حمایت ساگرتا باپو گھاٹ 2500 کروڑ سے مکمل ہوں گے۔ فیس I بی کے تحت 3141 کروڑ سے عثمان ساگر تابا پو گھاٹ 11 کیلو میٹرترقی دی جائیگی۔ موسیٰ ندی کی ترقی کے علاوہ سیاحتی مرکزاورروزگار کے مواقع میں اضافہ کرناحکومت کا منصوبہ ہے۔ شاپنگ مالس، تفریحی پارکس، اسٹریٹ ونڈرزون،لائٹ اینڈ ساؤنڈ شواورواٹر اسپورٹس کی سہولتیں دستیاب رہیں گی۔ ندی کے دونوں جانب 20 میٹرکا گرین بیلٹ تعمیر کیا جائے گا۔ گنڈی پیٹ تاباپو گھاٹ کشتی رانی کی سہولت رہے گی۔ پروجیکٹ کیلئے اراضی حصول قانون 2013 کے تحت منصوبہ بندی کی گئی اورمتاثرین کو مناسب معاوضہ ادا کیا جائے گا۔وزیراعلی نے پروجیکٹ میں شریک تمام محکمہ جات کو بہتر تال میل کے ذریعہ پہلے مرحلہ کی عاجلانہ تکمیل کی ہدایت دی ہے۔ وزیراعلی نے عہدیداروں سے کہا کہ وہ شہر کے ترقیاتی منصوبہ کی تکمیل کو اولین ترجیح دیں۔۔ ہندوستھان سماچار

ہندوستان سماچار / محمدعبدالخالق