جوبلی ہلز میں کانگریس کی کامیابی یقینی، میناکشی نٹراجن اور مہیش کمار گوڑ کا دعویٰحیدرآباد، 6 اکتوبر (ہ س)۔ صدر پردیش کانگریس مہیش کمار گوڑ نے جوبلی ہلز انتخابی مہم میں مصروف سرکردہ قائدین کے ساتھ اجلاس منعقد کرتے ہوئے صورتحال کا جائزہ لیا۔ اے آئی سی سی انچارج تلنگانہ میناکشی نٹراجن، اے آئی سی سی سکریٹری وشواناتھن، ریاستی وزیر زراعت ٹی ناگیشور راؤ، صدر نشین اقلیتی فینانس کارپوریشن عبید اللہ کوتوال، صدرنشین لائبریریز محمدریاض، صدرنشین اردو اکیڈیمی طاہر بن حمدان، صدرنشین اسپورٹس اتھاریٹی شیواسیناریڈی، رکن راجیہ سبھا ان ل کمار یادو اوردیگر قائدین نے اجلاس میں شرکت کی۔ صدرپردیش کانگریس نے جوبلی ہلز کے تینوں ڈیویژنس میں پارٹی کے موقف کا جائزہ لیا اور قائدین کو ہدایت دی کہ وہ گھر گھر پہنچ کر عوام سے ربط قائم کریں اور حکومت کی فلاحی اسکیمات سے واقف کرایا جائے۔ انہوں نے کہا کہ بی آر ایس کی مخالف حکومت مہم کے جواب میں کانگریس قائدین کو فلاحی اسکیمات کی تفصیلات سے واقف کرانا چاہئے۔ انہوں نے کہا کہ انتخابی وعدوں کی تکمیل اورفلاحی اسکیموں کی تفصیلات پر مبنی پمفلٹس تیار کرتے ہوئے عوام میں تقسیم کئے جائیں۔ میناکشی نٹراجن نے قائدین سے کہا کہ وہ پارٹی کی کامیابی کے لئے متحرک ہوجائیں۔ انہوں نے کہاکہ حکومت کی کارکردگی سے عوام مطمئن ہیں اور انہیں حکومت کی اسکیمات کے فوائد سے واقف کرایا جائے۔ صدر پردیش کانگریس نے کارپوریشنوں کے صدورنشین اور انچارج قائدین کو ہدایت دی کہ وہ انتخابی مہم میں تیزی پیداکریں اورعوامی ردعمل کے بارے میں پردیش کانگریس کمیٹی کو آگاہ کیا جائے۔ ہندوستھان سماچار

ہندوستان سماچار / محمدعبدالخالق