دہشت گردی کو فروغ دینے کی کسی بھی کوشش کو برداشت نہیں کیا جائے گا ۔ایس ایس پی

جموں، 31 اکتوبر (ہ س)۔ سینئر سپرنٹنڈنٹ آف پولیس رام بن ارون گپتا نے کہا ہے کہ چناب ویلی طویل عرصے سے دشمن ملک کے نشانے پر رہی ہے، جو وقتاً فوقتاً خطے کے امن اور فرقہ وارانہ ہم آہنگی کو متاثر کرنے کی کوشش کرتا رہا ہے۔ تاہم انہوں نے دوٹوک الفاظ میں کہا کہ دہشت گردی کو دوبارہ فروغ دینے کی کسی بھی کوشش کو ہر قیمت پر ناکام بنایا جائے گا۔

راشٹریہ ایکتا دیوس کے موقع پر بانہال میں منعقدہ پولیس عوام رابطہ اجلاس کے دوران میڈیا سے گفتگو کرتے ہوئے ایس ایس پی گپتا نے کہا کہ سیکورٹی فورسز پوری طرح چوکس اور مستعد ہیں اور چناب ویلی سے دہشت گردی کے تمام باقی ماندہ اثرات کو ختم کرنے کے لیے پرعزم ہیں۔ انہوں نے بتایا کہ ڈی آئی جی ڈوڈہ کشتواڑ رام بن رینج کی قیادت میں دہشت گردی کے خلاف آپریشنز جاری ہیں اور دہشت گردی کی جڑوں کو مکمل طور پر اکھاڑ پھینکنے کے لیے ہر ممکن قدم اٹھایا جا رہا ہے۔ پولیس، فوج، دیگر سیکورٹی فورسز اور خفیہ ایجنسیاں پائیدار امن کے قیام کے لیے باہمی تال میل کے ساتھ کام کر رہی ہیں۔

ایس ایس پی گپتا نے مزید کہا کہ اگرچہ ضلع رام بن کی سرحدیں چھ مختلف اضلاع سے ملتی ہیں، تاہم اس وقت علاقے میں دہشت گردی کے کسی بھی اثر یا سرگرمی کا کوئی سراغ موجود نہیں ہے۔ انہوں نے واضح کیا کہ ہم اس بات کے لیے پرعزم ہیں کہ چناب ویلی کے کسی بھی حصے میں دہشت گردی یا اس کے نظریے کو دوبارہ پنپنے نہیں دیا جائے گا۔

انہوں نے کہا کہ ضلع میں اس وقت امن و امان کی فضا قائم ہے، جسے عوامی تعاون، بیداری اور باہمی ہم آہنگی کے ذریعے برقرار رکھنا لازمی ہے۔ ایس ایس پی نے عوام سے اپیل کی کہ وہ اتحاد، بھائی چارے اور اعتماد کے جذبے کو مضبوط بناتے ہوئے اس خطے کے امن کو مزید مستحکم کریں۔

ہندوستھان سماچار

---------------

ہندوستان سماچار / محمد اصغر