نئی دہلی، 29 اکتوبر (ہ س)۔ ملک کی سب سے بڑی کوئلہ پیدا کرنے والی کمپنی کول انڈیا لمیٹڈ (سی آئی ایل) نے رواں مالی سال 2025-26 کی دوسری سہ ماہی کے لیے اپنے نتائج کا اعلان کیا ہے۔ پبلک سیکٹر کمپنی سی آئی ایل کا مجموعی خالص منافع جولائی تا ستمبر سہ ماہی میں 32 فیصد کم ہو کر 4,262.64 کروڑ روپے ہو گیا۔

کول انڈیا لمیٹڈ نے بدھ کو اسٹاک ایکسچینج کی فائلنگ میں اطلاع دی کہ اس کا مجموعی منافع رواں مالی سال کی جولائی-ستمبر سہ ماہی میں کم فروخت اور زیادہ اخراجات کی وجہ سے 32 فیصد کم ہو کر 4,262.64 کروڑ ہو گیا۔ کمپنی نے گزشتہ سال جولائی تا ستمبر سہ ماہی میں 6,274.80 کروڑ کا مجموعی منافع کمایا تھا۔

سی آئی ایل نے کہا کہ سال کے دوران اس کی مجموعی فروخت 27,271.30 کروڑ روپے سے گھٹ کر 26,909.23 کروڑ روپے ہوگئی۔ اس مدت کے دوران کمپنی کے اخراجات 7 فیصد بڑھ کر 26,421.86 کروڑ روپے ہو گئے، جو پچھلے مالی سال کی اسی مدت میں 24,670.70 کروڑ روپے تھے۔ کوئلے کی گھریلو پیداوار میں کول انڈیا لمیٹڈ کا 80 فیصد سے زیادہ حصہ ہے۔ ستمبر میں کوئلے کی پیداوار سال بہ سال 3.9 فیصد کم ہو کر 48.9 ملین ٹن (ایم ٹی) رہ گئی۔

مرکزی کوئلہ اور کانوں کے وزیر جی کشن ریڈی نے پہلے کہا تھا کہ ستمبر میں بارشوں کی وجہ سے کان کنی کی سرگرمیاں متاثر ہوئی تھیں، جس کی وجہ سے پبلک سیکٹر کوئلہ پیدا کرنے والی کمپنی سی آئی ایل کی پیداوار میں کمی واقع ہوئی تھی۔ تاہم مرکزی وزیر نے واضح کیا کہ ملک میں کوئلے کی کوئی کمی نہیں ہے۔

---------------

ہندوستان سماچار / عبدالسلام صدیقی