چنڈی گڑھ، 21 اکتوبر (ہ س)۔ پنچکولہ پولیس نے پنجاب کے سابق ڈائریکٹر جنرل آف پولیس، ان کی اہلیہ، بیٹی اور بہو کے خلاف اپنے بیٹے کے قتل اور قتل کی سازش کرنے کے الزام میں مقدمہ درج کیا ہے۔ پنچکولہ پولیس نے ایڈوکیٹ عقیل اختر کی موت کے بعد ایک خودکشی نوٹ اور برآمد ہونے والی ویڈیو کی بنیاد پر کارروائی کی۔ یہ پورا معاملہ ایک اعلیٰ خاندان کے اندر ناجائز تعلقات سے جڑا ہوا ہے۔

دراصل پنجاب کے سابق ڈی جی پی محمد مصطفیٰ کے بیٹے عقیل اختر کا 16 اکتوبر کی رات پنچکولہ میں انتقال ہو گیا تھا۔ پولیس کو دیے گئے بیان میں لواحقین نے کہا کہ عقیل (35) نے کچھ دوائیاں کھا لی تھیں۔ گھر والوں نے اسے بے ہوش پایا۔ اس کے بعد اسے علاج کے لیے سیکٹر 6 کے سول اسپتال لے جایا گیا، جہاں اسے مردہ قرار دے دیا گیا۔ موت کے بعد ان کی لاش کو ہریانہ کے سیکٹر 6 کے پنچکولہ کے سرکاری اسپتال لے جایا گیا جہاں پوسٹ مارٹم کیا گیا۔ 17 اکتوبر کی صبح اہل خانہ عقیل کی لاش کو لے کر اتر پردیش کے سہارنپور گئے، جہاں نماز جنازہ کے بعد اسے سپرد خاک کر دیا گیا۔

اس کے بعد عقیل کی ایک ویڈیو منظر عام پر آئی جس میں اس کا دعویٰ ہے کہ اس کے گھر والے اسے قتل کرنے کی سازش کر رہے ہیں۔ عقیل کی موت کے حوالے سے ملیرکوٹلہ میں اس کے پڑوسی شمس الدین نے سنگین الزامات عائد کرتے ہوئے دعویٰ کیا کہ عقیل کی بیوی اور والد کے درمیان ناجائز تعلقات تھے جس میں رضیہ سلطانہ بھی ملوث تھی۔ عقیل نے 27 اگست کو اپنے سوشل میڈیا اکاؤنٹ پر ایک ویڈیو شیئر کی۔ 16 منٹ، 11 سیکنڈ کی اس ویڈیو میں عقیل یہ کہتے ہوئے شروع کرتے ہیں، آج 27 اگست ہے، میں یہ ویڈیو صرف اپنے ریکارڈ رکھنے کے لیے شوٹ کر رہا ہوں۔ مجھے اپنے والد اور بیوی کے افیئر کا ڈیڑھ سال پہلے پتہ چلا، مجھے اس کے بارے میں پہلے ہی معلوم ہونا چاہیے تھا، تاہم، 2018 میں، ان کی شادی کے ایک سال بعد، میں نے کمرے میں رنگے پاتھوں پکڑلیا تھا لیکن وہ بھاگ گیا۔

شمس الدین کی طرف سے پنچکولہ پولیس کمشنر کو جمع کرائی گئی شکایت کی بنیاد پر، پنچکولہ ایم ڈی سی پولیس اسٹیشن نے اب محمد مصطفی، ان کی اہلیہ، سابق وزیر رضیہ سلطانہ، بہو اور بیٹی کے خلاف مقدمہ درج کیا ہے۔ حالانکہ پنچکولہ پولیس کی طرف سے جاری تحریری پریس نوٹ میں کسی کا نام نہیں بتایا گیا ہے، تاہم پولیس نے سابق ڈی جی پی اور دیگر کے ملوث ہونے کی تصدیق کی۔ پنچکولہ کے ڈی سی پی سریشٹی گپتا نے کیس کی تصدیق کرتے ہوئے کہا کہ اے سی پی رینک کے افسر کی نگرانی میں ایک خصوصی تحقیقاتی ٹیم (ایس آئی ٹی) تشکیل دی گئی ہے تاکہ منصفانہ، شفاف اور ثبوت پر مبنی تحقیقات کی جا سکیں۔ ایس آئی ٹی کیس کے ہر پہلو کی مکمل جانچ کرے گی۔ پنچکولہ پولیس نے کہا کہ تفتیش غیر جانبداری اور کھلے ذہن کے ساتھ کی جائے گی، اس بات کو یقینی بناتے ہوئے کہ کسی کو بھی بخشا نہیں جائے گا اور کسی بے قصور کے ساتھ ظلم نہیں ہوگا۔

---------------

ہندوستان سماچار / عبدالسلام صدیقی