کابل، 18 اکتوبر (ہ س)۔ افغانستان کرکٹ بورڈ (اے سی بی) نے ہفتہ کو اعلان کیا ہے کہ اس نے پاکستان میں ہونے والی سہ فریقی ٹی 20 انٹرنیشنل سیریز سے دستبرداری کا فیصلہ کیا ہے۔ یہ سیریز نومبر کے آخر میں پاکستان، سری لنکا اور افغانستان کے درمیان کھیلی جانی تھی۔

افغان ٹیم 17 نومبر سے پاکستان کا دورہ کر کے سیریز میں حصہ لینے والی تھی، لیکن جمعہ (17 اکتوبر) کی شام پکتیکا صوبے کے ارگون ضلع میں افغان کرکٹرز پر ہونے والے حملے کے بعد یہ فیصلہ کیا گیا ہے۔ اس حملے میں افغان گھریلو کرکٹ ٹیم کے کھلاڑی کبیر، سبغت اللہ اور ہارون سمیت آٹھ افراد ہلاک اور سات دیگر زخمی ہوگئے۔ یہ کھلاڑی پکتیکا صوبے کے دارالحکومت شرانا میں ایک دوستانہ کرکٹ میچ کھیلنے کے لیے پہنچے تھے۔

اے سی بی نے اپنے بیان میں کہا، ’’اس المناک واقعے کے پیش نظر اور شہید کھلاڑیوں کے احترام میں افغانستان کرکٹ بورڈ نے پاکستان میں ہونے والی آئندہ سہ رخی سیریز میں حصہ نہیں لینے کا فیصلہ کیا ہے۔‘‘

بورڈ نے پاکستان پر حملے کا الزام لگاتے ہوئے کہا، ’’افغانستان کرکٹ بورڈ ارگون ضلع کے بہادر کرکٹرز کی شہادت پر گہرا دکھ اور افسوس کا اظہار کرتا ہے، جنہیں آج شام پاکستانی حکومت کی جانب سے کیے گئے ایک بزدلانہ حملے میں نشانہ بنایا گیا۔‘‘

اے سی بی نے اس واقعے کو افغان کھیل برادری، کھلاڑیوں اور کرکٹ خاندان کے لیے ’’بڑا نقصان‘‘ قرار دیا اور شہداء کے خاندانوں اور پکتیکا صوبے کے عوام کے ساتھ ہمدردی کا اظہار کیا۔

افغانستان کے تیز گیند باز فضل الحق فاروقی نے اپنے سرکاری فیس بک پیج پر اس حملے کی سخت مذمت کی۔ انہوں نے لکھا، ’’شہریوں اور ہمارے گھریلو کرکٹ کھلاڑیوں کی شہادت ایک ناقابل معافی جرم ہے۔ بے گناہوں کے قتل عام کرنے والوں کو معاف نہیں کیا جا سکتا۔‘‘

موجودہ وقت میں افغانستان اور پاکستان کے بگڑتے تعلقات کے پیش نظر کئی ماہرین کا کہنا ہے کہ مستقبل میں آئی سی سی کے مقابلوں میں دونوں ممالک کے کھلاڑیوں کے درمیان مصافحہ کرنا بھی مشکل ہو سکتا ہے۔

ہندوستھان سماچار

---------------

ہندوستان سماچار / انظر حسن