اندور، 7 ستمبر (ہ س)۔ مدھیہ پردیش کے اندور ضلع میں مری ماتا چوراہے کے قریب اتوار کی رات ایک دردناک سڑک حادثے میں ایکٹیوا سوار دو دوستوں کی موت ہوگئی۔ تیز رفتار کار نے ان کی ایکٹیوا کو زوردار ٹکر مار دی۔ ٹکر اتنی شدید تھی کہ دونوں نوجوان اچھل کر کئی فٹ دور جاگرے اور شدید زخمی ہوگئے۔ انہیں اسپتال لے جایا گیا، جہاں علاج کے دوران دونوں نے دم توڑ دیا۔ پولیس نے کار ضبط کرکے حادثے کی تحقیقات شروع کردی ہے۔

پولیس کے مطابق مرنے والوں کی شناخت ستیہ سائی نگر کے رہنے والے راج (28) ولد روی سونیرے اور نند کشور سولنکی (30) کے طور پر ہوئی ہے۔ دونوں دوست اتوار کی رات ایکٹیوا سے گھومنے نکلے تھے۔ رات تقریباً 11:30 بجے مری ماتا چوراہے کے قریب سڑک عبور کرتے وقت تیز رفتار کار نے ان کی ایکٹیوا کو ٹکر مار دی۔ ٹکر کے بعد دونوں سڑک پر کئی فٹ دور جاگرے۔ شدید زخمی حالت میں انہیں اسپتال پہنچایا گیا، جہاں دورانِ علاج دونوں کی موت ہوگئی۔

حادثے کے بعد آس پاس موجود لوگوں نے کار کو موقع پر ہی روک لیا۔ بعد میں گاڑی کو پولیس تھانے پہنچایا گیا۔ پولیس نے کار ضبط کرلی ہے اور حادثے کی وجوہات کے ساتھ ساتھ کار کی رفتار اور ڈرائیور کے کردار کی بھی جانچ کی جا رہی ہے۔اہل خانہ کے مطابق راج اوون کا کام کرتا تھا اور کاریگر تھا۔ اس کے خاندان میں بیوی، دو بھائی اور والدین ہیں۔ وہیں نند کشور سبزی فروخت کرنے کا کام کرتا تھا۔ اس کے خاندان میں والد کے علاوہ ایک بڑا اور ایک چھوٹا بھائی ہے۔ دونوں دوستوں کی موت کی خبر ملنے کے بعد ان کے خاندانوں میں غم کی لہر دوڑ گئی ہے۔

ہندوستھان سماچار

ہندوستان سماچار / Mohammad Khan