نئی دہلی، 3 ستمبر (ہ س)۔ کانگریس کے قومی صدر اور راجیہ سبھا میں اپوزیشن لیڈر ملکارجن کھرگے نے ہلدوانی جلسہ گاہ کے مبینہ ’شُدھیکرن‘ کے معاملے میں 24 دن گزرنے کے باوجود ایف آئی آر درج نہ ہونے پر ناراضی کا اظہار کیا ہے۔ انہوں نے راجیہ سبھا میں ایوان کے لیڈر جگت پرکاش نڈا کو خط لکھ کر اتراکھنڈ حکومت کو ہدایت دینے، معاملے میں ملوث افراد اور تنظیموں کے خلاف فوری ایف آئی آر درج کرانے اور قصورواروں کے خلاف سخت کارروائی یقینی بنانے کی اپیل کی ہے۔

کھرگے نے بدھ کو نڈا کو لکھے خط میں 13 اگست کو راجیہ سبھا میں ہوئی بحث کا ذکر کیا۔ انہوں نے کہا کہ 8 اگست 2026 کو ہلدوانی کے رام لیلا میدان میں ان کے جلسہ عام کے بعد کچھ تنظیموں کی جانب سے مبینہ طور پر چھوت چھات پر مبنی شُدھیکرن کرایا گیا تھا۔ اس وقت نڈا نے ایوان میں اس واقعے کو انتہائی افسوسناک قرار دیتے ہوئے تحقیقات اور قصورواروں کے خلاف سخت کارروائی کا یقین دلایا تھا۔ راجیہ سبھا کے چیئرمین نے بھی واقعے پر افسوس کا اظہار کیا تھا۔

کھرگے نے خط میں نڈا کی جانب سے ایوان میں دی گئی یقین دہانی کا حوالہ دیتے ہوئے کہا کہ اتنی واضح یقین دہانی کے باوجود ہلدوانی پولیس-انتظامیہ کی جانب سے اب تک ایف آئی آر درج نہ کیا جانا مایوس کن اور حیران کن ہے۔ انہوں نے نڈا سے اپنی یقین دہانی کے مطابق اتراکھنڈ حکومت کو ضروری ہدایات دینے کی اپیل کی۔

کانگریس صدر نے کہا کہ رام لیلا میدان کی جگہ کا مبینہ شُدھیکرن کرایا جانا ہندوستانی آئین کی بنیادی روح اور انسانی اقدار کے منافی ہے۔ انہوں نے اسے چھوت چھات اور ذات پات پر مبنی ذہنیت سے جوڑا۔ کھرگے نے تاریخی پس منظر کا ذکر کرتے ہوئے کہا کہ بابا صاحب ڈاکٹر بھیم راؤ امبیڈکر کی مہاڑ تحریک کے دوران تالاب سے پانی پینے کے بعد بھی ذات پات کے تکبر میں مبتلا لوگوں نے گوموتر، گوبر اور منتر جاپ کے ذریعے شُدھیکرن کیا تھا۔

کھرگے نے کہا کہ صرف منتر پڑھنے یا ہون کرنے سے کوئی ذات پات پر مبنی عمل مقدس نہیں ہو جاتا۔ یہ معاملہ صرف ان کی ذاتی عزت نفس یا کانگریس صدر کے عہدے تک محدود نہیں ہے، بلکہ ملک کے ان کروڑوں محروم لوگوں کے جذبات سے جڑا ہے، جو ایسی سماجی حقیقتوں کا سامنا کرتے ہیں۔

انہوں نے نڈا سے مطالبہ کیا کہ ایوان میں دی گئی یقین دہانی کے مطابق اتراکھنڈ حکومت کو واضح ہدایات جاری کی جائیں اور ہلدوانی کے واقعے کے لیے ذمہ دار تنظیموں اور افراد کے خلاف بغیر کسی تاخیر کے قانونی کارروائی یقینی بنائی جائے۔

ہندوستھان سماچار

---------------

ہندوستان سماچار / عبدالواحد