کولکاتا، 24 ستمبر (ہ س)۔ کلکتہ ہائی کورٹ نے نندی گرام ضمنی انتخاب میں کانگریس امیدوار ملن پردھان کو راحت دیتے ہوئے ہدایت دی ہے کہ ریاستی پولیس آئندہ 12 اکتوبر تک ان کے خلاف کسی نئے معاملے میں کوئی تعزیراتی کارروائی نہیں کر سکے گی۔ جسٹس سوگت بھٹاچاریہ کی عدالت نے جمعرات کو معاملے کی سماعت کرتے ہوئے واضح کیا کہ اس مقررہ مدت کے دوران پردھان کو کسی نئے مقدمے میں گرفتار بھی نہیں دکھایا جا سکتا۔
سماعت کے دوران کانگریس امیدوار کے وکیل ایان بھٹاچاریہ نے الزام عائد کیا کہ ریاستی حکومت نے اپنے سابقہ یقین دہانی کی براہ راست خلاف ورزی کی ہے۔ دفاع کی جانب سے دلیل دی گئی کہ ریاست نے پہلے عدالت کو یقین دلایا تھا کہ پردھان کے خلاف کوئی نیا مقدمہ زیرِ التوا نہیں ہے، لیکن اس کے باوجود انہیں ایک نئے معاملے میں پھنسا کر 7 اکتوبر تک عدالتی حراست میں بھیج دیا گیا ہے۔ وکیل نے عدالت سے اپیل کی کہ چونکہ نندی گرام میں آئندہ 6 اکتوبر کو ووٹنگ ہونی ہے، اس لیے ان کے موکل کو جمہوری عمل میں حصہ لینے اور انتخاب لڑنے کا مناسب موقع دیا جانا چاہیے۔
ریاستی حکومت کی جانب سے ایڈیشنل ایڈووکیٹ جنرل راج دیپ مجومدار نے دعویٰ کیا کہ کانگریس امیدوار کو نئے معاملے میں 19 تاریخ کو ہی گرفتار کر لیا گیا تھا اور یہ بات 21 تاریخ کو عدالت کے علم میں لائی گئی ۔ تاہم، دفاع نے اس دعوے کو یکسر مسترد کرتے ہوئے کہا کہ ان کے موکل کے خلاف بدھ کو ہی نیا مقدمہ عائد کیا گیا ہے۔
دونوں فریقوں کو سننے کے بعد ہائی کورٹ نے ریاستی حکومت کی دلیل مسترد کر دی۔ عدالت نے سخت تبصرہ کرتے ہوئے کہا کہ اس کے سامنے ایسا کوئی مستند دستاویز موجود نہیں ہے، جس کی بنیاد پر یہ یقینی بنایا جا سکے کہ کانگریس امیدوار کے پروڈکشن وارنٹ پر عمل درآمد ہو رہا تھا۔ اس کے ساتھ ہی عدالت نے ریاست کو ہدایت دی کہ زیرِ التوا دیگر چھ معاملات میں بھی فی الحال کوئی نیا قدم نہ اٹھایا جائے۔
قابل ذکر ہے کہ ملن پردھان کو گزشتہ جمعہ کو مشرقی مدناپور کے چندی پور سے 2007 کی نندی گرام اراضی حصول مخالف تحریک سے متعلق پرانے مقدمات میں گرفتار کیا گیا تھا۔ پولیس کے مطابق ان کے خلاف قتل، اقدامِ قتل، غیر قانونی اجتماع اور لوٹ مار کے الزامات کے تحت نندی گرام اور کھجوری تھانوں میں مقدمات درج ہیں۔ فی الحال ہلدیہ سب ڈویژنل عدالت نے انہیں 5 اکتوبر تک اور کانتھی عدالت نے ایک دیگر معاملے میں 7 اکتوبر تک عدالتی حراست میں رکھنے کا حکم دیا ہے۔
ہندوستھان سماچار
ہندوستان سماچار / محمد شہزاد
