آئیچی-ناگویا (جاپان)، 24 ستمبر (ہ س): بھارت کی ووشو کھلاڑی ناؤریَم روسِبینا دیوی نے ایشیائی کھیلوں میں مسلسل تیسرا تمغہ جیت کر تاریخ رقم کی ہے۔ خواتین کے 60 کلوگرام سانڈا زمرے میں چاندی کا تمغہ جیتنے کے ساتھ ہی وہ ایشیائی کھیلوں میں ووشو میں مسلسل تین تمغے جیتنے والی پہلی بھارتی خاتون بن گئی ہیں۔

روسِبینا کو جمعرات کو فائنل میں چین کی ژانگ شیاؤیو کے خلاف 2-0 سے شکست کا سامنا کرنا پڑا۔ ژانگ نے دونوں راؤنڈ 0-5 سے جیت کر سونے کا تمغہ اپنے نام کیا۔

روسِبینا کا ایشیائی کھیلوں میں تمغہ جیتنے کا سلسلہ 2018 میں شروع ہوا تھا۔ انہوں نے جکارتہ ایشیائی کھیلوں میں کانسی کا تمغہ جیتا تھا۔ اس کے بعد 2022 کے ہانگژو ایشیائی کھیلوں میں انہوں نے چاندی کا تمغہ حاصل کیا اور اب 2026 میں بھی چاندی کا تمغہ جیت کر مسلسل تین ایشیائی کھیلوں میں تمغہ حاصل کرنے کا اعزاز حاصل کرلیا۔

روسِبینا دیوی کے ایشیائی کھیلوں کے تمغے:

2018 — کانسے کا تمغہ

2022 — چاندی کا تمغہ

2026 — چاندی کا تمغہ

جاپان میں روسِبینا کی مہم بھی شاندار رہی۔ انہوں نے سیمی فائنل میں انڈونیشیا کی تھانیا کُسُمنِنگتیاَس کو 0-2 سے شکست دے کر فائنل میں جگہ بنائی تھی۔ اس سے قبل انہوں نے ویتنام کی 2023 کی عالمی چیمپئن گوین تھی تھوئی کو بھی شکست دی تھی۔

فائنل میں شکست کے باوجود روسِبینا کی یہ کامیابی بھارتی ووشو کے لیے تاریخی ہے۔ وہ اب ایشیائی کھیلوں کے مسلسل تین ایڈیشنز میں تمغہ جیتنے والی پہلی بھارتی خاتون ووشو کھلاڑی بن گئی ہیں۔

ہندوستھان سماچار

---------------

ہندوستان سماچار / عبدالواحد