ہندی کی ترقی کے لیے دیگر بھارتی زبانوں کا احترام فروغ اور تحفظ ضروری : امت شاہ

نئی ممبئی ، 14 ستمبر (ہ س)۔ مرکزی وزیر داخلہ امت شاہ نے پیر کو نئی ممبئی میں کہا کہ ہندی کی ترقی اسی وقت بامعنی ہوگی جب اس کے ساتھ دیگر بھارتی زبانوں کے وقار، فروغ اور تحفظ کو بھی یقینی بنایا جائے۔ ہندی دیوس کے موقع پر ملک کے عوام کو مبارکباد دیتے ہوئے انہوں نے بھارت کی لسانی تنوع کو ملک کی طاقت قرار دیا۔

نئی ممبئی میں ہندی دیوس کے موقع پر منعقدہ پروگرام سے خطاب کرتے ہوئے امت شاہ نے کہا کہ بھارت میں بولی جانے والی متعدد زبانیں کسی کمزوری کی علامت نہیں بلکہ ملک کی سب سے بڑی طاقت ہیں۔ ہر بھارتی زبان کی اپنی تاریخ، لوک روایات اور دنیا کو دیکھنے کا اپنا نقطہ نظر ہے، جو نئی نسل کی اقدار اور سوچ کو تشکیل دینے میں اہم کردار ادا کرتا ہے۔ انہوں نے کہا کہ لسانی تنوع ملک میں تنوع میں اتحاد کے جذبے کو بھی مضبوط کرتا ہے۔

وزیر داخلہ نے کہا کہ زبان صرف اظہار اور رابطے کا ذریعہ نہیں بلکہ کسی بھی معاشرے کی یادداشت اور خود آگہی بھی ہوتی ہے۔ ہندی نے رابطے، باہمی میل جول اور تال میل کی زبان کے طور پر مختلف طبقات اور برادریوں کو جوڑنے میں اہم کردار ادا کیا ہے۔ امت شاہ نے کہا کہ ہندی کی ترقی اسی وقت بامعنی ہوگی جب وہ دیگر بھارتی زبانوں کے وقار، فروغ اور تحفظ کو یقینی بناتے ہوئے آگے بڑھے۔ انہوں نے کہا کہ ہندی کو کسی ایک زبان کی نمائندہ زبان کے طور پر نہیں دیکھا جانا چاہیے۔ اسے بھارت کی مختلف زبانوں اور قومی اتحاد کے درمیان ایک اہم رابطے کے طور پر سمجھنے کی ضرورت ہے۔

مرکزی وزیر داخلہ نے کہا کہ گجراتی ان کی مادری زبان ہے، لیکن ہندی انہیں ملک کے مختلف حصوں کے لوگوں سے براہ راست جڑنے میں مدد دیتی ہے۔ انہوں نے نوجوانوں سے اپیل کی کہ وہ اپنی مادری زبان سے جڑے رہنے کے ساتھ ساتھ دنیا سے بھی سیکھیں۔ انہوں نے والدین سے بھی اپیل کی کہ وہ اپنے بچوں سے ان کی مادری زبان میں بات چیت کریں۔امت شاہ نے کہا کہ زبان ہی وہ ذریعہ ہے جو ہمیں ہماری مادر وطن، ہماری مٹی، ہماری تاریخ اور ہماری ثقافت سے جوڑتی ہے۔

قابل ذکر ہے کہ 14 ستمبر 1949 کو دستور ساز اسمبلی نے ہندی کو وفاق کی سرکاری زبان کے طور پر تسلیم کیا تھا۔ اسی مناسبت سے ہر سال 14 ستمبر کو ہندی دیوس منایا جاتا ہے۔

ہندوستھان سماچار

--------------------

ہندوستان سماچار / جاوید این اے