لکھنؤ، 30 اگست (ہ س)۔

اتر پردیش میں سرکاری درج فہرست ذات (ایس سی) کے طلبہ کے ہاسٹلوں کی سہولیات بہتر بنانے کے لیے ریاستی حکومت نے بڑا قدم اٹھایا ہے۔ سماجی بہبود کے وزیر مملکت (آزادانہ چارج) عاصم ارون نے ریاست کے تمام 223 سرکاری ایس سی ہاسٹلوں کی دیکھ بھال، مرمت اور بنیادی سہولیات کو بہتر بنانے کے لیے 12.45 کروڑ روپے کے بجٹ کی منظوری دی ہے۔وزیر نے افسران کو ہدایت دی ہے کہ ہاسٹلوں میں مرمت اور دیکھ بھال کے تمام کام معیاری طریقے سے اور مقررہ مدت کے اندر مکمل کیے جائیں۔

حکومت کی جانب سے ہاسٹلوں کی گنجائش کے مطابق دیکھ بھال اور مرمت کے لیے رقم جاری کی جائے گی۔ 50 طلبہ کی گنجائش والے ہاسٹل کو زیادہ سے زیادہ 5 لاکھ روپے تک فراہم کیے جائیں گے۔منظور شدہ بجٹ سے ہاسٹلوں میں پینے کے پانی کی سہولت، بجلی کے آلات کی مرمت و بہتری، بیت الخلا کی مرمت، رنگ و روغن، سکیورٹی اور صفائی سے متعلق ضروری سہولیات کو بہتر بنایا جائے گا۔

حکومت کا مقصد طلبہ کو صاف ستھرا، محفوظ اور تعلیم کے لیے سازگار رہائشی ماحول فراہم کرنا ہے۔ریاستی وزیر عاصم ارون نے کہا کہ حکومت درج فہرست ذات کے طلبہ کو معیاری تعلیم کے ساتھ بہتر اور باوقار رہائشی سہولیات فراہم کرنے کے لیے پرعزم ہے۔انہوں نے کہا، ’’ہاسٹل صرف رہنے کی جگہ نہیں بلکہ طلبہ کے مستقبل کی تعمیر کے مراکز ہیں۔‘‘ ان کے مطابق بجٹ کی اس منظوری سے ریاست کے تمام 223 ہاسٹلوں کی سہولیات میں بڑے پیمانے پر بہتری آئے گی۔

ہندوستھان سماچار

ہندوستان سماچار / Mohammad Khan