پٹنہ، 24 اگست(ہ س)۔ وزیر اعلیٰ سمراٹ چودھری نے آج گنگاندی کے بڑھتے ہوئے پانی کی سطح اور سیلاب کی صورتحال کے پیش نظر مختلف متاثرہ اور حساس علاقوں کا فضائی سروے کیا اور صورتحال کا جائزہ لیا۔ وزیر اعلیٰ نے نوگچھیا راگھو پور دیارہ، کوسی گنگا سنگم علاقہ، بیگوسرائے اور بختیار پورسمت مختلف علاقوں کو فضائی سروے کیا۔ فضائی سروے کے دوران وزیر اعلیٰ نے گنگا ندی اور اس کی معاون ندیوں کے پانی کی سطح، دیارہ اور نشیبی علاقوں کی صورتحال اور متاثرہ علاقوں میں راحت اور بچائو کے کام کی صورتحال کا جائزہ لیا۔ وزیراعلیٰ نے متعلقہ حکام کو سیلاب کی صورتحال کی مسلسل نگرانی کرنے اور حساس علاقوں میں مکمل چوکسی برتنے کی ہدایت کی۔ اس دوران وزیر اعلیٰ نے حکام کو ہدایت دی کہ وہ متاثرہ افراد کو خوراک، پینے کے پانی، امدادی سامان اور دیگر ضروری سہولیات کی بروقت فراہمی کو یقینی بنائیں۔

فضائی سروے کے بعد وزیر اعلیٰ نے بھاگلپور ایئر پورٹ پر سینئر حکام کے ساتھ جائزہ میٹنگ کی اور سیلاب کی صورتحال، پانی کی سطح، راحت اوربچائو کے کام اور متاثرہ علاقوں میں انتظامی تیاریوں کا تفصیلی جائزہ لیا۔ جائزہ کے دوران افسران نے وزیر اعلیٰ کو بتایا کہ پانی کا دباؤ تیزی سے کم ہو رہا ہے اور جلد ہی صورتحال میں بہتری آئے گی۔ مغربی بنگال کے وزیر اعلیٰ کے ساتھ ان کی بات چیت کے بعد فرکا بیراج کے تمام دروازے کھول دیے گئے ہیں۔

وزیر اعلیٰ نے کہا کہ سیلاب سے متاثرہ لوگوں کی حفاظت ریاستی حکومت کی اولین ترجیح ہے۔ کسی بھی ہنگامی صورت حال کی صورت میں لوگوں کو محفوظ مقامات پر منتقل کرنے کے لیے تمام ضروری تیاریاں پوری رکھی جائیں اور راحت اور بچاؤ کے کاموں میں کوئی کوتاہی نہیں ہونی چاہیے۔ انہوں نے ضلع انتظامیہ اور متعلقہ محکموں کو ہدایت کی کہ وہ ایک دوسرے کے ساتھ مل کر کام کریں اور پانی کی سطح اور سیلاب کی صورتحال میں کسی بھی قسم کی تبدیلی کی مسلسل نگرانی کریں۔ وزیر اعلیٰ نے افسران کو ہدایت دی کہ وہ مرمت کا کام بلا تاخیر انجام دیں اور حساس علاقوں کی مسلسل نگرانی کریں۔

وزیر اعلیٰ نے کہا کہ آبی وسائل محکمہ پوری طرح مستعد رہے اور مسلسل نگرانی کرتا رہے۔ سیلاب کی صورت میں ایس او پی کے مطابق متاثرہ افراد کو مکمل امداد فراہم کرتے رہیں۔ راحت اور بچاؤ کا کام پوری مستعدی اور حساسیت کے ساتھ کریں۔

؎ہندوستھان سماچار

ہندوستان سماچار / Mohammad Afzal Hassan