لاتور ضلع میں پولیس کی منفرد مہم، حادثہ زدہ گاڑی ہائی وے پر لٹکا کر بیداری

۔ چار افراد کی ہلاکت والے واقعے کو مثال بنا کر عوام کو کیا جا رہا ہےخبردار

لاتور، ممبئی ، 4 مئی (ہ س)۔ مہاراشٹر کے ضلع لاتور کے اوسا تعلقہ میں تیز رفتار اور ٹریفک قوانین کی خلاف ورزی سے ہونے والے جان لیوا حادثات کو روکنے کے لیے پولیس نے ایک منفرد اور مؤثر بیداری مہم شروع کی ہے۔ پولیس سپرنٹنڈنٹ امول تامبے کے تصور کے تحت اوسا پولیس نے ایک ایسی پہل کی ہے جس نے عوام کی توجہ اپنی جانب مبذول کر لی ہے۔

یہ اقدام اس المناک حادثے کے بعد کیا گیا، جو 6 مارچ کی رات اوسا–تلجا پور ہائی وے پر پیش آیا تھا، جہاں ایک تیز رفتار بی ایم ڈبلیو کار حادثے کا شکار ہو گئی تھی اور چار افراد موقع پر ہی ہلاک ہو گئے تھے۔ تفتیش میں یہ بات سامنے آئی تھی کہ ان افراد نے سیٹ بیلٹ استعمال نہیں کیا تھا، جس کے باعث انہیں اپنی جان سے ہاتھ دھونا پڑا۔ اسی واقعے کو مثال بناتے ہوئے پولیس نے حادثے کا شکار ہونے والی اسی گاڑی کو چار لوہے کے ستونوں کے سہارے ہائی وے کے قریب فضا میں لٹکا دیا ہے۔ اس کے ساتھ ایک معلوماتی بورڈ بھی نصب کیا گیا ہے جس پر واضح طور پر لکھا ہے کہ سیٹ بیلٹ استعمال نہ کرنے کی وجہ سے چار افراد کی جان گئی۔

یہ بصری پیغام ہائی وے سے گزرنے والے گاڑی چلانے والوں پر گہرا اثر ڈال رہا ہے، جس کے نتیجے میں کئی ڈرائیور اپنی رفتار کم کرتے ہوئے اور احتیاط برتتے ہوئے دیکھے جا رہے ہیں۔ اوسا ایم آئی ڈی سی سے وانودا موڑ تک کا علاقہ ایک خطرناک بلیک اسپاٹ کے طور پر جانا جاتا ہے، جہاں اب تک 50 سے زائد افراد مختلف حادثات میں اپنی جان گنوا چکے ہیں۔ تاہم پولیس حکام کے مطابق اس نئی مہم کے بعد اس علاقے میں حادثات کی تعداد میں کچھ حد تک کمی دیکھی گئی ہے۔

اوسا کے پولیس انسپکٹر ریون ڈمالے نے عوام سے اپیل کرتے ہوئے کہا کہ زندگی قیمتی ہے اور ایک معمولی غلطی پورے خاندان کو تباہ کر سکتی ہے۔ انہوں نے کہا کہ تیز رفتار سے گریز کریں، سیٹ بیلٹ کا استعمال یقینی بنائیں اور ٹریفک قوانین کی پابندی کریں کیونکہ یہی وقت کی اہم ضرورت ہے۔ یہ اقدام نہ صرف ایک انتباہی پیغام کے طور پر سامنے آیا ہے بلکہ سڑکوں پر محفوظ ڈرائیونگ کے لیے ایک عملی مثال بھی بن گیا ہے۔

ہندوستھان سماچار

--------------------

ہندوستان سماچار / جاوید این اے