جموں, 30 مئی (ہ س)۔ آٹھویں مرکزی تنخواہ کمیشن کا وفد 31 مئی سے 5 جون تک جموں و کشمیر کے دورے پر رہے گا، جہاں وہ سرکاری ملازمین، یونینوں اور مختلف انجمنوں کے نمائندوں سے ملاقات کرکے ان کی تجاویز اور مطالبات سنے گا۔محکمہ خزانہ کی جانب سے جاری ایک سرکاری مراسلے کے مطابق کمیشن یکم جون کو سرینگر میں جموں و کشمیر حکومت کے ساتھ ایک خصوصی اجلاس منعقد کرے گا۔ اجلاس صبح 11 بجے سے دوپہر ایک بجے تک ایس کے آئی سی سی کے کانفرنس ہال میں ہوگا اور اس کی صدارت چیف سکریٹری کریں گے۔

اجلاس میں مختلف محکموں کے ایڈیشنل چیف سکریٹریز، پرنسپل سکریٹریز، کمشنر سکریٹریز اور محکمہ خزانہ کے اعلیٰ افسران شرکت کریں گے۔ اس دوران تنخواہوں کے ڈھانچے، ملازمت کی شرائط اور سرکاری ملازمین سے متعلق دیگر امور پر تفصیلی تبادلہ خیال کیا جائے گا۔

حکومتی ذرائع کے مطابق کمیشن اپنے جائزہ عمل کے دوران مختلف فریقین کی آراء اور سفارشات حاصل کرے گا تاکہ مستقبل کی سفارشات مرتب کرتے وقت ان تجاویز کو مدنظر رکھا جا سکے۔

ہندوستھان سماچار

---------------

ہندوستان سماچار / محمد اصغر