موبائل فون چھین کر بھاگ رہے تین بدمعاش تصادم کے بعد گرفتار، ایک کو گولی لگی

شاہ جہاں پور، 21 اپریل (ہ س)۔ اتر پردیش کے ضلع شاہ جہاں پور کے تھانہ پوایاں علاقے میں گزشتہ دیر رات موبائل فون چھین کر بھاگ رہے بائیک سوار بدمعاشوں اور پولیس کے درمیان ہونے والے تصادم میں ایک بدمعاش گولی لگنے سے زخمی ہو گیا۔ پولیس نے زخمی بدمعاش اور اس کے دو ساتھیوں کو گرفتار کر لیا۔ زخمی بدمعاش کو علاج کے لیے سرکاری میڈیکل کالج میں بھرتی کرایا گیا ہے۔

سرکل آفیسر (سی او) پوایاں پروین ملک نے منگل کو بتایا کہ گزشتہ دیر رات پوایاں پولیس کو اطلاع ملی کہ ایک شخص کا موبائل فون چھیننے والے تین بدمعاش موٹر سائیکل سے سسورا کی طرف جا رہے ہیں۔ بدمعاشوں کو پکڑنے کے لیے پولیس ٹیم نے محمدی روڈ پر انڈر پاس کے قریب چیکنگ شروع کر دی۔ اسی دوران موٹر سائیکل سے آ رہے بدمعاشوں کو پولیس ٹیم نے رکنے کا اشارہ کیا تو موٹر سائیکل سوار بدمعاشوں نے موٹر سائیکل کی رفتار بڑھا دی اور بھاگنے لگے۔ جلد بازی میں ان کی موٹر سائیکل بے قابو ہو کر پھسل گئی۔ ٹیم نے انہیں پکڑنے کی کوشش کی تو بدمعاشوں نے پولیس ٹیم پر فائرنگ کر دی۔

پولیس ٹیم نے جوابی کارروائی کی، جس میں پوایاں تھانہ علاقے کا رہائشی بدمعاش سوربھ مشرا گولی لگنے سے زخمی ہو کر گر گیا۔ پولیس نے ناکہ بندی کر کے زخمی بدمعاش سوربھ مشرا اور اس کے دونوں ساتھیوں، پوایاں علاقے کے رہائشی ارپت سکسینہ اور ضلع لکھیم پور کھیری کے تھانہ محمدی علاقے کے گاوں سسورا کے رہائشی موسم دیکشت کو گرفتار کر لیا۔

سرکل آفیسر نے بتایا کہ پیر کو جٹھیا پور خورد کے رہائشی آشیش سکسینہ مینا بازار سے سبزی خریدنے گئے تھے۔ اس دوران تینوں بدمعاشوں نے ان کا موبائل فون چھین لیا اور پلزر موٹر سائیکل سے فرار ہو گئے۔ بدمعاشوں کو پکڑنے کے لیے پولیس کی دو ٹیمیں تشکیل دی گئی تھیں۔ انہوں نے بتایا کہ بدمعاش راہگیروں کو نشانہ بنا کر اس طرح کے واقعات کو انجام دینے کے عادی ہیں۔ ان کے خلاف ضلع کھیری اور شاہ جہاں پور میں کئی مقدمات درج ہیں۔ بدمعاش کے پاس سے ناجائز اسلحہ اور کارتوس، چھینا گیا موبائل فون برآمد ہوا ہے۔ زخمی بدمعاش کو علاج کے لیے سرکاری میڈیکل کالج میں بھرتی کرایا گیا ہے۔

ہندوستھان سماچار

---------------

ہندوستان سماچار / انظر حسن