کولکاتہ، 2 اپریل (ہ س):۔

مرکزی وزیر داخلہ امت شاہ نے مغربی بنگال اسمبلی انتخابات کے درمیان بھوانی پور حلقہ کے لئے بھارتیہ جنتا پارٹی (بی جے پی) کے امیدوار سوبھیندو ادھیکاری کی نامزدگی سے قبل جمعرات کو کولکاتہ میں ایک روڈ شو کیا۔ شو کے دوران انہوں نے ریاست میں سیاسی تبدیلی پر زور دیا اور پارٹی امیدواروں کی حمایت میں ووٹ دینے کی اپیل کی۔

ہزارہ کراسنگ سے شروع ہونے والے روڈ شو میں امت شاہ اور سوبھیندو ادھیکاری ایک ساتھ موجود تھے۔ بی جے پی کے دیگر امیدوار، جو جمعرات کو اپنے کاغذات نامزدگی داخل کرنے والے ہیں، بھی اس تقریب میں شامل ہوئے۔

اجتماع سے خطاب کرتے ہوئے مرکزی وزیر داخلہ نے کہا کہ مغربی بنگال میں تبدیلی ناگزیر ہے، اور بھوانی پور میں بھی تبدیلی ضروری ہے۔ انہوں نے عوام سے اپیل کی کہ وہ ریاست میں تبدیلی لانے کے لیے بی جے پی امیدواروں کی بھاری اکثریت سے جیت کو یقینی بنائیں۔

امت شاہ نے کہا کہ انہوں نے سوبھیندو ادھیکاری پر زور دیا کہ وہ نہ صرف نندی گرام سے بلکہ وزیر اعلیٰ ممتا بنرجی کے گڑھ بھوانی پور سے بھی الیکشن لڑیں۔ انہوں نے دعویٰ کیا کہ پچھلی بار ممتا بنرجی ریاست میں حکومت بنانے میں کامیاب رہی تھیں، لیکن نندی گرام میں سوبھیندو ادھیکاری سے ہار گئیں۔

انہوں نے یہ بھی کہا کہ بی جے پی ہر سیٹ جیت کر 170 تک پہنچ جائے گی، لیکن بھوانی پور سیٹ جیتنے سے ریاست کی سیاست میں بڑا پیغام جائے گا۔ انہوں نے کہا کہ بنگال میں تبدیلی لانے کا ایک شارٹ کٹ ہے۔ بھوانی پور میں ممتا کو شکست دیں اور کام ہو جائے گا۔

اس سے پہلے سوبھیندو ادھیکاری نے اپنا پرچہ نامزدگی داخل کرنے سے پہلے بھوانی پور کے گرودوارہ اور لکشمی نارائن مندر میں پوجا کی۔ بی جے پی ذرائع کے مطابق روڈ شو کے اختتام کے بعد امیدوار سروے بھون جائیں گے اور اپنا پرچہ نامزدگی داخل کریں گے۔

قابل ذکر ہے کہ امت شاہ نامزدگی کی تقریب میں شرکت کے لیے بدھ کی رات دیر گئے کولکاتہ پہنچے۔ بی جے پی بھی اس نامزدگی کی تقریب کو طاقت کے مظاہرہ کے طور پر دیکھ رہی ہے۔

ہندوستھان سماچار

ہندوستان سماچار / عطاءاللہ