بھوپال، 02 اپریل (ہ س)۔ مدھیہ پردیش میں موسم نے اچانک کروٹ لے لی ہے۔ ریاست میں آندھی، بارش اور اولہ باری کا مضبوط سسٹم سرگرم ہونے سے گزشتہ 72 گھنٹوں سے موسم مسلسل بدلا ہوا ہے۔ بدھ کو ریاست کے کئی حصوں میں اس کا اثر دیکھنے کو ملا، وہیں آج جمعرات کو بھوپال، اندور سمیت 30 اضلاع میں بارش کا الرٹ جاری کیا گیا ہے۔ جبکہ نیماڑ خطے کے دھار، بڑوانی اور جھابوا میں اولے گرنے کا بھی امکان ظاہر کیا گیا ہے۔
محکمہ موسمیات کے مطابق، اس تبدیلی کی وجہ ریاست میں سرگرم سائکلونک سرکولیشن اور ٹرف سسٹم ہیں۔ ساتھ ہی، شمال مغربی حصے میں بھی دو گردابی سسٹم سرگرم ہیں، جس سے یہ صورتحال برقرار ہے۔ محکمہ موسمیات کا اندازہ ہے کہ اپریل کے پہلے ہفتے میں ایسا ہی ملا جلا موسم برقرار رہے گا۔ 7 اپریل سے ایک نیا ویسٹرن ڈسٹربنس سرگرم ہوگا، جس سے 10 اپریل تک کہیں آندھی تو کہیں بارش دیکھنے کو مل سکتی ہے۔ اس کے بعد موسم صاف ہوتے ہی گرمی تیزی سے بڑھے گی۔
اگلے 24 گھنٹوں میں گوالیار، بھوپال، اندور، اجین، مرینا، شیوپور، شیوپوری، گنا، اشوک نگر، نیمچ، مندسور، رتلام، علی راج پور، جھابوا، دھار، بڑوانی، آگر-مالوہ، راج گڑھ، ودیشا، رائسین، نرمدا پورم، چھندواڑہ، پانڈھرنا، بیتول، ہردا، کھنڈوا، برہان پور، کھرگون، دیواس اور شاجاپور میں بارش ہو سکتی ہے۔ چھندواڑہ، سیونی اور پانڈھورنا میں 40 سے 50 کلومیٹر فی گھنٹہ کی رفتار سے تیز آندھی چلنے کا امکان ہے، جبکہ دیگر اضلاع میں 30 سے 40 کلومیٹر فی گھنٹہ کی رفتار سے ہوائیں چل سکتی ہیں۔
اس سے پہلے بدھ کو بھی کئی اضلاع میں موسم کا اثر دیکھنے کو ملا۔ بھوپال میں گرج چمک کے ساتھ بارش ہوئی، جبکہ سیہور میں آندھی کے ساتھ اولے گرے۔ اندور، اجین، دیواس، کھنڈوا، جبل پور سمیت کئی اضلاع میں موسم بدلا رہا۔ بارش اور آندھی کے درمیان گرمی کا اثر بھی قائم ہے۔ نرمدا پورم میں زیادہ سے زیادہ درجہ حرارت 40 ڈگری سیلسیس درج کیا گیا۔ رتلام، منڈلا، کھجوراہو، رائسین، دموہ اور ساگر میں بھی درجہ حرارت 38 سے 39 ڈگری کے آس پاس رہا۔ بڑے شہروں میں جبل پور 38.4 ڈگری، بھوپال 37.4 ڈگری، اندور 36.5 ڈگری، گوالیار 36.1 ڈگری اور اجین 35.6 ڈگری سیلسیس ریکارڈ کیا گیا۔
وہیں، اپریل کے دوسرے ہفتے سے درجہ حرارت میں تیز اضافے کے اشارے ہیں۔ مہینے کے آخری ہفتے میں گوالیار، دھار، کھرگون، بڑوانی اور کھجوراہو جیسے علاقوں میں درجہ حرارت 44 سے 45 ڈگری سیلسیس تک پہنچ سکتا ہے۔ جنوبی اور مغربی مدھیہ پردیش میں گرم ہواؤں کے باعث شدید گرمی پڑنے کا امکان ہے۔
ہندوستھان سماچار
---------------
ہندوستان سماچار / انظر حسن
