اپڈیٹ۔۔۔ تھانے میں خوفناک سڑک حادثہ، 11 افراد ہلاک
ممبئی ، 13 اپریل (ہ س)۔ مہاراشٹر کے تھانے ضلع میں کلیان۔احمدنگر ہائی وے پر رائتے گاؤں کے قریب پیر کی صبح پیش آنے والے ہولناک سڑک حادثے میں 11 افراد ہلاک اور ایک معمر خاتون زخمی ہو گئی۔ اس حادثے کی تحقیقات ٹٹوالہ پولیس اسٹیشن کی ٹیم کر رہی ہے۔ پولیس کے مطابق پِک اپ گاڑی میں ڈرائیور سمیت کل 12 افراد سوار تھے اور یہ گاڑی مُرباڑ سے کلیان کی جانب جا رہی تھی۔ صبح تقریباً 11 بجے رائتے گاؤں کے قریب نئے پل پر سامنے سے آنے والے سیمنٹ مکسر سے اس کی زور دار ٹکر ہو گئی۔ ٹکر اتنی شدید تھی کہ پِک اپ میں سوار افراد گاڑی کے اندر پھنس گئے۔
اطلاع ملتے ہی ٹٹوالہ پولیس اور مقامی ٹیمیں موقع پر پہنچ گئیں اور ریسکیو آپریشن کے ذریعے پھنسے ہوئے افراد کو باہر نکالا۔ ان میں سے 11 افراد موقع پر ہی ہلاک ہو گئے جبکہ ایک معمر خاتون زخمی ہوئیں، جنہیں پہلے مُرباڑ کے سرکاری اسپتال منتقل کیا گیا، بعد ازاں انہیں نجی اسپتال میں منتقل کر دیا گیا۔ پولیس کے مطابق ہلاک ہونے والوں میں سے نو افراد کی شناخت ہو چکی ہے جبکہ دو افراد کی شناخت کا عمل جاری ہے۔ جاں بحق افراد میں مُرباڑ کے رہائشی پرشانت عرف ببّلو روپیش چندانے (21)، بھوشن گھورپڑے (49)، گووندا کیمبری (50)، اننت پوار، دیپک گاؤلی، گنپت جینو مادھے، سنیہا موہپے (22)، مانسی موہپے (20) اور پرتھمیش موہپے (17) شامل ہیں۔
ریاستی وزیر ٹرانسپورٹ پرتاپ سرنائیک نے کہا کہ پِک اپ گاڑی کی گنجائش صرف چھ مسافروں کی تھی، لیکن اس میں 11 افراد سوار تھے، جو حادثے کی ایک بڑی وجہ ہو سکتی ہے۔ انہوں نے اس واقعے کو انتہائی افسوسناک قرار دیتے ہوئے کہا کہ تحقیقات کے بعد جو بھی قصوروار پایا جائے گا، اس کے خلاف سخت کارروائی کی جائے گی۔
ہندوستھان سماچار
--------------------
ہندوستان سماچار / جاوید این اے
