فوج نے سی آر پی ایف اور آئی ٹی بی پی کے ساتھ اہم کانفرنس منعقد کی

جموں، 07 مارچ (ہ س)۔ جموں و کشمیر کے ضلع ادھم پور میں فوج کی ناردرن کمانڈ نے ہفتہ کے روز انڈو-تبتی بارڈر پولیس (آئی ٹی بی پی) اور بارڈر سیکورٹی فورس (بی ایس ایف) کے ساتھ ایک سینرجی کانفرنس کا انعقاد کیا تاکہ بدلتے ہوئے سیکورٹی منظرنامے کے پیش نظر باہمی تال میل کو مزید مضبوط بنایا جا سکے۔ حکام کے مطابق یہ کانفرنس جنرل آفیسر کمانڈنگ اِن چیف ناردرن کمانڈ لیفٹیننٹ جنرل پرتک شرما کی قیادت میں منعقد ہوئی، جس میں آپریشنل نظام سے متعلق معلومات کے تبادلے، حکمت عملیوں اور صلاحیتوں کو ہم آہنگ بنانے پر زور دیا گیا تاکہ ابھرتے ہوئے سیکورٹی چیلنجز کا مؤثر طریقے سے مقابلہ کیا جا سکے۔

ناردرن کمانڈ نے سوشل میڈیا پلیٹ فارم ایکس پر ایک پوسٹ میں کہا کہ قومی سلامتی کو مضبوط بنانے کے لیے ہیڈکوارٹر ناردرن کمانڈ نے آئی ٹی بی پی اور بی ایس ایف کے ساتھ تال میل بڑھانے کے مقصد سے سینرجی کانفرنس کا اہتمام کیا۔

پوسٹ میں کہا گیا کہ اجلاس میں بدلتے ہوئے سیکورٹی حالات پر تفصیلی غور کیا گیا اور آپریشنل ڈھانچے سے متعلق تجربات اور معلومات کا تبادلہ کیا گیا تاکہ مشترکہ حکمت عملی کے ذریعے درپیش چیلنجز کا مقابلہ کیا جا سکے۔فوج کے مطابق لیفٹیننٹ جنرل پرتک شرما نے کانفرنس میں شریک افسران سے بات چیت کی اور مختلف آپریشنز کے دوران ان کی لگن اور عزم کی ستائش کی۔

فوج نے کہا کہ اجلاس میں ہونے والی گفتگو سے باہمی اعتماد اور تعاون کے جذبے کو مزید تقویت ملی اور ایک محفوظ اور مضبوط ملک کے لیے مشترکہ عزم کا اعادہ کیا گیا۔اس موقع پر جدید آلات اور ٹیکنالوجی کی نمائش بھی منعقد کی گئی، جس میں فورسز کی جانب سے شامل کی گئی نئی ٹیکنالوجیز کو پیش کیا گیا تاکہ مستقبل کے تقاضوں کے مطابق تیار رہا جا سکے۔

ہندوستھان سماچار

---------------

ہندوستان سماچار / محمد اصغر