نئی دہلی، 06 مارچ (ہ س)۔ دوارکا ضلع کے اتم نگر علاقے میں ہولی کے موقع پر دو برادریوں کے درمیان تصادم میں ترون نامی نوجوان کی ہلاکت کے بعد نیم فوجی دستوں اور پولیس کو تعینات کر دیاگیا ہے۔ اس واقعہ کے بعد سے علاقے میں کشیدگی ہے۔ جمعہ کو مشتعل افراد نے ملزم کے گھر کے باہر کھڑی ایک کار کو آگ لگا دی۔ گزشتہ رات بھی اسی مقام پر تین گاڑیوں میں توڑ پھوڑ کی گئی تھی جن میں سے ایک کو آگ لگا دی گئی تھی۔

ادھر پولیس نے قتل کی دفعات کے تحت مقدمہ درج کر کے چار ملزمان کو گرفتار کر لیا ہے۔ ایک نابالغ کو بھی پوچھ گچھ کے لیے حراست میں لیا گیا ہے۔ پولیس گرفتار ملزمان سے پوچھ گچھ کر رہی ہے اور جرائم میں ملوث دیگر ملزمان کے بارے میں معلومات اکٹھی کر رہی ہے۔ پولیس دیگر ملزمان کی شناخت کے لیے وائرل ویڈیو اور سی سی ٹی وی فوٹیج کا بھی جائزہ لے رہی ہے۔ ذرائع نے بتایا کہ ایک ہندو سیاسی تنظیم کے ارکان نے بھی پولیس کو 24 گھنٹے کا الٹی میٹم دیا ہے، جس میں ترون (26) کی موت اور متاثرہ کے خاندان پر مبینہ حملے میں ملوث تمام افراد کی گرفتاری کا مطالبہ کیا گیا ہے۔

بدھ کے روز، اتم نگر کے جے جے کالونی علاقے میں ہولی کے جشن کے دوران الگ الگ برادریوں کے دو خاندانوں کے درمیان تشدد ہوا تھا۔ ابتدائی تفتیش کے بعد پولیس کو پتہ چلا کہ تنازعہ ایک غبارے کے رنگین پانی کے چھینٹے پڑنے کے بعد شروع ہوا، جس پر دونوں خاندانوں کے افراد کے درمیان گرما گرم بحث ہوئی۔اس کے بعد ہوئی جھڑپ میں ترون شدید زخمی ہوگیا۔ اسے اسپتال میں داخل کرایا گیا، جہاں علاج کے دوران اس کی موت ہوگئی۔

متوفی کے اہل خانہ کا الزام ہے کہ چھت پر ہولی کھیلنے والی 11 سالہ لڑکی نے نیچے اپنے رشتہ داروں پر پانی کا غبارہ پھینکا تھالیکن وہ سڑک پر گرا اور پھوٹ گیا، جس سے دوسرے خاندان کی ایک خاتون پر رنگ چھینٹے پڑ گئے ۔ جھڑپ میں مقتول نوجوان کے دادا مان سنگھ نے الزام لگایا کہ خاتون نے ان کے ساتھ بدزبانی کی اور جلد ہی اس کے خاندان کے کئی افراد کو اکٹھا کیا، جنہوں نے مبینہ طور پر ہولی کھیلنے والے لوگوں پر حملہکر دیا۔

انہوں نے الزام لگایا کہ شروع میں لڑائی ختم ہوتی دکھائی دے رہی تھی، لیکن بعد میں ملزمان نے ترون پر حملہ کر دیا۔ الزام ہے کہ ترون اپنے دوستوں کے ساتھ ہولی کھیل کر گھر واپس آرہا تھا کہ دوسری طرف سے لوگوں نے اس پر حملہ کردیا۔ انہوں نے اسے بے دردی سے مارا اور جب وہ سڑک پر گرا تو انہوں نے اس کے سینے پر ایک بڑے پتھر سےحملہ کر دیا۔ ترون کے چچا رمیش نے بتایا کہ ترون پہلے ہوئے جھگڑے سے بے خبر تھا اور جب وہ گلی میں داخل ہوا تو لاٹھی، ڈنڈے اور پتھروں سے مسلح آٹھ سے دس لوگوں نے اس پر حملہ کر دیا۔

واقعہ کے بعد اہل خانہ اور مقامی باشندوں نے اتم نگر پولیس اسٹیشن کے باہر احتجاج کرتے ہوئے ملزم کے خلاف کارروائی کا مطالبہ کیا۔ احتجاج کے دوران کچھ لوگ پرتشدد ہوگئے اور علاقے میں کھڑی گاڑیوں کو نقصان پہنچایا۔ مظاہرین نے دوسرے فریق سے لڑنے کی کوشش بھی کی۔ تاہم سیکورٹی اہلکاروں نے مداخلت کرکے ہجوم کو منتشر کردیا۔ علاقے میں سیکورٹی فورسز کو تعینات کر دیا گیا ہے۔ پولیس معاملے کی مزید تفتیش کر رہی ہے۔

ہندوستھان سماچار

ہندوستان سماچار / محمد شہزاد