کولکاتا، 30 مارچ (ہ س)۔ انڈیا کے الیکشن کمیشن نے پیر کو مغربی بنگال اور تمل ناڈو اسمبلی انتخابات کے پہلے مرحلے کے لیے نوٹیفکیشن جاری کرتے ہوئے ریاستوں میں انتخابی عمل کا باقاعدہ آغاز کر دیا ہے۔ نوٹیفکیشن کے اجراءکے بعد امیدواروں کے کاغذات نامزدگی جمع کرانے کا سلسلہ بھی شروع ہو گیا ہے۔

الیکشن کمیشن کے مطابق مغربی بنگال میں انتخابات دو مرحلوں میں ہوں گے۔ پہلے مرحلے میں 152 اسمبلی سیٹوں کے لیے ووٹنگ 23 اپریل کو ہوگی۔ باقی 142 سیٹوں کے لیے دوسرے مرحلے میں 29 اپریل کو ووٹنگ ہوگی۔ اس کے لیے نوٹیفکیشن 2 اپریل کو جاری کیا جائے گا۔

پہلے مرحلے کے لیے کاغذات نامزدگی داخل کرنے کی آخری تاریخ 6 اپریل ہے، جب کہ جانچ پڑتال 7 اپریل کو ہوگی۔ امیدوار 9 اپریل تک اپنے کاغذات نامزدگی واپس لے سکتے ہیں۔ دوسرے مرحلے کے لیے کاغذات نامزدگی داخل کرنے کی آخری تاریخ 9 اپریل، جانچ پڑتال 10 اپریل، اور دستبرداری کی آخری تاریخ 13 اپریل ہے۔

الیکشن کمیشن کے مطابق ووٹوں کی گنتی 4 مئی کو ہوگی جب کہ تمام انتخابی عمل 6 مئی تک مکمل کرلیا جائے گا۔

نوٹیفکیشن کے اجراء کے ساتھ ہی متعلقہ علاقوں میں ماڈل ضابطہ اخلاق بھی نافذ ہو گیا ہے، جس کے تحت منصفانہ اور شفاف انتخابات کو یقینی بنانے کے لیے انتخابی مہم اور حکومتی سرگرمیوں پر مقررہ قوانین نافذ کیے گئے ہیں۔

ملٹی فیز پولنگ کے پیش نظر، آزادانہ اور منصفانہ ووٹنگ کو یقینی بنانے کے لیے ریاست کے مختلف حلقوں میں حفاظتی انتظامات سخت کیے جانے کا امکان ہے۔

---------------

ہندوستان سماچار / عبدالسلام صدیقی