علی گڑھ, 20 مارچ (ہ س) ضلع مجسٹریٹ سنجیو رنجن کی صدارت میں کلکٹریٹ آڈیٹوریم میں ضلع صفائی کمیٹی اور ضلع سوچھ بھارت مشن مینجمنٹ کمیٹی کی جائزہ میٹنگ منعقد ہوئی۔ میٹنگ میں صفائی، دیہی ترقی، تالابوں کے تحفظ، بایو انرجی اور عوامی صحت سے متعلق منصوبوں کی پیش رفت کا تفصیلی جائزہ لیا گیا اور متعلقہ افسران کو مؤثر عمل درآمد کے لیے ضروری ہدایات جاری کی گئیں۔میٹنگ میں بتایا گیا کہ منتخب او ڈی ایف ماڈل پلس دیہات میں ٹھوس اور مائع کچرے کے انتظام کے تحت آر آر سی مراکز چلائے جا رہے ہیں۔ ضلع کی 136 گرام پنچایتوں میں گھر گھر کچرا جمع کرنے اور کچرے کی علیحدگی کا عمل کامیابی سے جاری ہے۔جبکہ دھنئی پور اور جواں کی ایک ایک اور خیر کی دو گرام پنچایتوں میں کام تسلی بخش نہ ہونے پر ضلع مجسٹریٹ نے سخت ناراضگی ظاہر کرتے ہوئے متعلقہ سیکریٹریوں کے خلاف سخت کارروائی کے احکامات دیے۔ انہوں نے ہدایت دی کہ ان چار گرام پنچایتوں سمیت اپریل کے مہینے سے مزید 140 نئی گرام پنچایتوں میں بھی یہ نظام شروع کیا جائے۔

---------------

ہندوستان سماچار / سید کامران علی گڑھ