سنیل تٹکرے کا مہندر تھوروے کے خلاف بھاری ہتک عزت کا دعویٰرائے گڑھ ، 16 مارچ (ہ س)۔ مہاراشٹر کے رائے گڑھ ضلع میں سیاسی کشیدگی اس وقت مزید بڑھ گئی جب نیشنلسٹ کانگریس پارٹی کے ریاستی صدر اور رکن پارلیمنٹ سنیل تٹکرے نے کرجت کے رکن اسمبلی مہندر تھوروے کے خلاف ہتک عزت کا مقدمہ دائر کر دیا۔ اطلاعات کے مطابق یہ مقدمہ رائے گڑھ کے مانگاؤں میں واقع سینئر دیوانی عدالت میں دائر کیا گیا ہے جس میں 65 کروڑ 3 ہزار روپے ہرجانے کا مطالبہ کیا گیا ہے۔یہ تنازع اس وقت پیدا ہوا جب خوپولی میں منگیش کالوکھے کے قتل کے بعد 27 دسمبر 2025 کو مہندر تھوروے نے ایک ٹی وی چینل کو دیے گئے انٹرویو میں کہا کہ رائے گڑھ میں “خون آلود سیاست” جاری ہے اور اس دوران بعض سنگین الزامات بھی عائد کیے۔ دعویٰ میں کہا گیا ہے کہ اس بیان سے رکن پارلیمنٹ سنیل تٹکرے کی ساکھ کو نقصان پہنچانے کی کوشش کی گئی اور عوام کے درمیان ان کے بارے میں غلط تاثر پیدا ہوا۔سنیل تٹکرے نے ان الزامات کو مسترد کرتے ہوئے کہا کہ ان کی طویل سیاسی زندگی میں انہوں نے مختلف اہم ذمہ داریاں سنبھالی ہیں اور ان کے خلاف لگائے گئے الزامات بے بنیاد اور سیاسی مفادات سے متاثر ہیں۔ انہوں نے عدالت سے مطالبہ کیا ہے کہ مہندر تھوروے کے بیانات کو جھوٹا اور ہتک آمیز قرار دیا جائے اور متعلقہ ویڈیو یا مواد کو تمام پلیٹ فارمز سے ہٹا دیا جائے۔ دعویٰ میں مزید درخواست کی گئی ہے کہ آئندہ ایسے بیانات دینے سے بھی روکا جائے اور 65 کروڑ 3 ہزار روپے بطور معاوضہ ادا کرنے کا حکم دیا جائے۔ہندوستھان سماچار--------------------
ہندوستان سماچار / جاوید این اے
