جموں, 24 فروری (ہ س)محکمہ صحت و طبی تعلیم کی جانب سے جاری اعداد و شمار کے مطابق جموں و کشمیر میں اس وقت ایک ہزار سے زائد ڈاکٹروں کی اسامیاں خالی ہیں۔

سرکاری تفصیلات کے مطابق کشمیر صوبہ میں مجموعی طور پر 797 اسامیاں خالی ہیں جن میں 24 سینئر ماہر معالج، 253 ماہر معالج، 458 طبی افسران اور 62 دندان ساز شامل ہیں، جبکہ جموں صوبہ میں فروری 2026 تک 288 ماہر معالجین کی اسامیاں خالی ہیں۔محکمہ صحت نے واضح کیا ہے کہ یونین ٹیریٹری کے اضلاع کو ماہر ڈاکٹروں کی شدید قلت کا سامنا نہیں ہے۔ دور دراز اور پسماندہ علاقوں میں ڈاکٹروں کی کمی کو پورا کرنے کے لیے حکومت نے حال ہی میں 480 طبی افسران کی اسامیاں تقرری کے لیے جموں و کشمیر پبلک سروس کمیشن کو بھیجی ہیں۔

محکمہ کے مطابق براہِ راست تقرری اور ترقی کے کوٹے کی اسامیوں کو ترجیحی بنیادوں پر پُر کرنے کے عمل کی نگرانی کی جا رہی ہے اور اس سلسلے میں وقتاً فوقتاً ضروری اقدامات کیے جا رہے ہیں۔ طبی افسران کے انتخابی عمل کی تکمیل کے بعد نئے منتخب شدہ ڈاکٹروں کو پالیسی کے مطابق دور افتادہ اور عملے کی کمی والے صحت مراکز میں تعینات کیا جائے گا۔حکام کا کہنا ہے کہ ضلعی اور تحصیل سطح کے اسپتالوں میں ماہر طبی خدمات کو مضبوط بنانے کے لیے متعدد اصلاحی اقدامات شروع کیے گئے ہیں۔ دستیاب ماہر عملے کی ازسرِ نو تقسیم، عارضی بنیادوں پر ماہرین کی خدمات کا حصول، نیشنل ہیلتھ مشن کے تحت تقرریاں، دور دراز علاقوں میں فاصلاتی طبی مشاورت کی سہولت اور دیگر اقدامات شامل ہیں۔

ان اقدامات سے غیر ضروری مریضوں کی منتقلی میں کمی اور مقامی سطح پر بہتر علاج کی فراہمی میں مدد ملے گی۔محکمہ کے مطابق سات نئے سرکاری طبی کالجوں کے قیام کے بعد مریضوں کا دباؤ گورنمنٹ میڈیکل کالج جموں اور گورنمنٹ میڈیکل کالج سری نگر پر نمایاں طور پر کم ہوا ہے، کیونکہ اب بیشتر ماہر خدمات نئے اداروں میں دستیاب ہیں۔ شدید ہنگامی حالات میں ہی مریضوں کو ان بڑے طبی مراکز میں بھیجا جاتا ہے۔پیرا طبی عملے کے حوالے سے محکمہ نے بتایا کہ خاندانی بہبود، زچگی و اطفال صحت اور حفاظتی ٹیکہ کاری کے شعبہ سے متعلق 292 نچلے درجے کی اسامیاں تقرری کے لیے جموں و کشمیر سروسز سلیکشن بورڈ کو بھیجی گئی ہیں جن کا اشتہار جاری ہو چکا ہے۔اسی طرح محکمہ صحت جموں کی 290 اسامیاں بھی مذکورہ بورڈ کو بھیجی گئی ہیں، جبکہ مزید 608 اسامیوں کی منظوری کے بعد انہیں بھی تقرری کے لیے روانہ کیا جائے گا۔وہیں محکمہ صحت کشمیر کے تحت 802 نچلے درجے کے عملے اور صفائی کارکنوں کی اسامیاں بھی زیرِ غور ہیں اور محکمہ خزانہ کی منظوری کے بعد انہیں بھی متعلقہ بورڈ کو بھیجا جائے گا۔

ہندوستھان سماچار

---------------

ہندوستان سماچار / محمد اصغر