کولکاتا، 13 اکتوبر (ہ س)۔ مغربی بنگال کی وزیر اعلیٰ شبھیندو ادھیکاری نے درگا پوجا کے دوسرے دن دوپہر میں شری بھومی کی درگا پوجا کا افتتاح کیا۔ اس بار پوجا کمیٹی نے ابتدا ہی سے اتحاد اور مقامی لوگوں کو ترجیح دینے کی بات کہی ہے۔ مقامی لوگوں کو اس بار کی پوجا میں نمایاں جگہ دی گئی ہے۔ شری بھومی کی گلیوں سے لے کر بینر، پوسٹر اور اشتہارات تک میں کہیں بھی سابق وزیر سجیت باسو کی تصویر نظر نہیں آرہی ہے۔ ایک وقت میں شری بھومی کی پوجا کو شاندار بنانے میں اہم کردار ادا کرنے والے سابق وزیر فی الحال جیل میں ہیں۔ پوجا سے پہلے گھر واپس آنے کی ان کی آخری کوشش بھی منگل کو ناکام ہوگئی۔

منگل کو کلکتہ ہائی کورٹ میں جسٹس تیرتھنکر گھوش کی بنچ نے اس معاملے کی سماعت کی اور سابق وزیر کی ضمانت کی عرضی خارج کردی۔بلدیاتی اداروں میں تقرریوں میں بدعنوانی کے معاملے میں انفورسمنٹ ڈائریکٹوریٹ (ای ڈی) نے 11 مئی کو مغربی بنگال کے سابق وزیر سجیت باسو کو گرفتار کیا تھا۔ اس روز تقریباً ساڑھے دس گھنٹے تک پوچھ گچھ کے بعد انہیں حراست میں لیا گیا تھا۔ اس کے بعد انہوں نے ضمانت کے لیے ہائی کورٹ سے رجوع کیا تھا۔

اس معاملے میں 12 اگست کو تحقیقاتی ایجنسی نے ہائی کورٹ میں دعویٰ کیا تھا کہ بلدیاتی اداروں میں 284 نااہل امیدواروں کو ملازمتیں دی گئیں اور اس کے بدلے ہر امیدوار سے چھ چھ لاکھ روپے وصول کیے گئے۔ ایجنسی کا یہ بھی دعویٰ ہے کہ سجیت باسو کے بینک کھاتے سے 8.8 کروڑ روپے کا پتہ چلا ہے۔ ہائی کورٹ میں تفتیشی افسران نے بتایا کہ صرف سابق وزیر ہی نہیں، بلکہ ان کے اہل خانہ کے بینک کھاتوں میں بھی کروڑوں روپے جمع پائے گئے ہیں۔ ان رقوم کے بارے میں وہ کوئی قابل اعتماد دستاویز یا قانونی وضاحت پیش نہیں کرسکے۔

بلدیاتی بدعنوانی کے اس معاملے میں سجیت باسو سے پہلے مبینہ بچولئے ایان شیل کو گرفتار کیا گیا تھا۔ اس سے قبل ای ڈی نے عدالت کو بتایا تھا کہ ایان شیل سے پوچھ گچھ کے دوران انکشاف ہوا کہ سجیت باسو نے جنوبی دم دم میونسپلٹی میں مختلف اوقات میں 152 افراد کو ملازمت دلانے کے لیے سفارش کی تھی۔ اسی انکشاف کی بنیاد پر سجیت باسو سے پوچھ گچھ کی گئی اور بعد میں انہیں جیل بھیج دیا گیا۔

ہندوستھان سماچار

ہندوستان سماچار / محمد شہزاد