جموں, 14 جنوری (ہ س)جموں و کشمیر کے لیفٹیننٹ گورنر منوج سنہا اور شمالی کمان کے آرمی کمانڈر لیفٹیننٹ جنرل پرتیک شرما نے بدھ کے روز مسلح افواج کے ویٹرن ڈے کے موقع پر سابق فوجیوں کو پرتپاک مبارکباد پیش کی اور ان کی بے مثال خدمات کو خراجِ تحسین پیش کیا۔لیفٹیننٹ گورنر منوج سنہا نے کہا کہ قوم مسلح افواج کے بہادر مردوں اور خواتین کی جرأت، قربانی اور ایثار کی ہمیشہ مقروض رہے گی۔ راج بھون کی جانب سے سوشل میڈیا پلیٹ فارم ایکس پر جاری پیغام میں انہوں نے ویر نارِیوں اور سابق فوجیوں کے اہلِ خانہ کے تئیں دلی تشکر اور احترام کا اظہار کیا۔ادھر، شمالی کمان کے آرمی کمانڈر لیفٹیننٹ جنرل پرتیک شرما اور شمالی کمان کے تمام رینکس نے بھی 10ویں مسلح افواج کے ویٹرن ڈے کے موقع پر سابق فوجیوں، ان کے اہلِ خانہ اور ویر نارِیوں کو مبارکباد پیش کی۔ شمالی کمان کے مطابق، یہ دن مادرِ وطن کے لیے جانوں کا نذرانہ پیش کرنے والے سپاہیوں کی قربانیوں کو یاد کرنے اور سابق فوجیوں کی خدمات کو سراہنے کا موقع ہے۔بیان میں مزید کہا گیا کہ لیفٹیننٹ گورنر منوج سنہا دن کے اواخر میں 10ویں مسلح افواج کے یومِ سابق فوجیان کی ریلی سے خطاب کریں گے۔واضح رہے کہ بھارتی فوج نے منگل کے روز سرحدی ضلع راجوری میں دو روزہ عظیم سابق فوجی ریلی کے ساتھ 10ویں مسلح افواج کے ویٹرن ڈیز کی تقریبات کا آغاز کیا، جس کے ذریعے سابق فوجیوں کی خدمات اور قربانیوں کے اعتراف کے قومی عزم کا اعادہ کیا گیا۔

ہندوستھان سماچار

ہندوستان سماچار / محمد اصغر