مشرقی سنگھ بھوم، 3 ستمبر (ہ س)۔

دن دہاڑے مسلح شرپسندوں نے ایک جیولری کی دکان سے لاکھوں روپے مالیت کے زیورات اور نقدی لوٹ لی اور فرار ہو گئے۔

یہ واقعہ بدھ کی دوپہر سوناری تھانہ علاقے میں پیش آیا۔ پانچ سے سات مسلح بد معاشوں نے گاہک ظاہر کرتے ہوئے وردھمان جیولرس میں گھس کر لاکھوں روپے کے زیورات اور نقدی لوٹ کر پلک جھپکتے ہی فرار ہوگئے۔ اس دوران بد معاشوں نے دکان کے مالک پر بھی پستول کے بٹ سے حملہ کر کے اسے زخمی کر دیا۔ اس اچانک واقعہ سے پورے علاقے میں بھگدڑ مچ گئی۔

واقعہ کی اطلاع ملتے ہی سینئر سپرنٹنڈنٹ آف پولیس (ایس ایس پی) پیوش پانڈے، سٹی ایس پی شیو آشیش کمار اور ڈی ایس پی منوج ٹھاکر اپنی ٹیم کے ساتھ جائے وقوعہ پر پہنچے اور جانچ شروع کی۔ پولیس نے پورے علاقے کو گھیرے میں لے لیا اور آس پاس نصب سی سی ٹی وی کیمروں کی فوٹیج چیک کر رہی ہے۔

خاص بات یہ ہے کہ جس جگہ یہ ڈکیتی ہوئی ہے اس سے تھوڑے ہی فاصلے پر اینٹی کرپشن بیورو (اے سی بی) کا دفتر واقع ہے۔ اس کے باوجود بد معاشوں کا دن دہاڑے بلا خوف و خطر وارداتیں شہر کے سکیورٹی نظام پر سنگین سوالات اٹھاتی ہیں۔ عینی شاہدین کے مطابق انہوں نے اپنے چہرے ڈھانپ رکھے تھے اور یہ سب پہلے سے طے شدہ منصوبہ بندی کے ساتھ آئے تھے۔

واقعہ کے بعد سوناری اور گردونواح کے تاجروں میں خوف و ہراس کا ماحول ہے۔ کئی تاجروں نے پولیس سے حفاظتی نظام مزید سخت کرنے کا مطالبہ کیا ہے۔ ایس ایس پی پیوش پانڈے نے کہا کہ بدمعاشوں کی شناخت کے لیے ایک خصوصی ٹیم تشکیل دی گئی ہے اور جلد ہی تمام ملزمان کو گرفتار کر لیا جائے گا۔

ہندوستھان سماچار

ہندوستان سماچار / عطاءاللہ