نئی دہلی، 3 ستمبر (ہ س)۔ وزیر خارجہ ڈاکٹر ایس جے شنکر نے بدھ کو جرمن وزیر خارجہ جوہان واڈے فل کے ساتھ دو طرفہ بات چیت کی۔ دونوں رہنماؤں نے تعاون کے مختلف شعبوں جیسے گرین ہائیڈروجن اور سیمی کنڈکٹرز پر تبادلہ خیال کیا۔ ہندوستان جس کو امریکی ٹیرف جنگ کا سامنا ہے، نے بات چیت میں خود مختاری اور کثیر قطبی دنیا کی اہمیت کو اجاگر کیا اور کہا کہ ایسی صورت حال میں ہندوستان اور یورپی یونین اور ہندوستان اور جرمنی کے لئے ایک دوسرے کے ساتھ زیادہ قریب سے کام کرنا ضروری ہے۔

دہلی کے حیدرآباد ہاؤس میں ڈاکٹر جے شنکر اور جرمن لیڈر واڈے فل کے درمیان ہونے والی بات چیت میں کئی اہم امور پر تبادلہ خیال کیا گیا۔ اس دوران دونوں رہنماؤں نے تجارتی تعلقات، تکنیکی تعاون، علاقائی اور بین الاقوامی سلامتی اور باہمی مشاورت اور تعاون کو مضبوط بنانے پر اتفاق کیا۔ بات چیت میں معیشت، موسمیاتی تبدیلی، دفاع اور ٹیکنالوجی کے شعبوں میں تعلقات کو مضبوط بنانے پر توجہ مرکوز کی گئی۔ بھارت اور جرمنی گرین ہائیڈروجن سیکٹر میں تعاون پر غور کر رہے ہیں۔ مذاکرات میں سیاسی تعاون، سیکورٹی اور دفاع، اقتصادی تعلقات، تحقیق اور مستقبل کی ٹیکنالوجی، آب و ہوا، توانائی اور تعلیم، مہارت، نقل و حرکت اور لوگوں کے درمیان تبادلے شامل ہیں۔ اس کے علاوہ مذاکرات میں یوکرین تنازع، مشرق وسطیٰ، ہند پیسیفک اور عالمی عدم استحکام پر تبادلہ خیال کیا گیا۔

اس کے بعد دونوں رہنماؤں نے مشترکہ پریس کانفرنس کی۔ بات چیت میں وزیر خارجہ ڈاکٹر جے شنکر نے کہا کہ دنیا کو اس وقت اقتصادی عدم استحکام اور سیاسی غیر یقینی جیسے دو بڑے چیلنجوں کا سامنا ہے۔ ہم سمجھتے ہیں کہ اگر دنیا کثیر قطبی رہتی ہے اور ممالک اسٹریٹجک خود مختاری کو برقرار رکھتے ہیں اور آپس میں گہرے مذاکرات اور تعاون کرتے ہیں تو ان چیلنجوں کا بہترین حل تلاش کیا جاسکتا ہے۔ انہوں نے کہا کہ ٹیرف میں کمی کرنا باہمی دلچسپی کا معاملہ ہے۔ آج کے ماحول میں یہ اور بھی اہم ہو گیا ہے۔

وزیر خارجہ نے عالمی غیر یقینی صورتحال کے درمیان ہندوستان-یورپی یونین اور ہندوستان-جرمنی کے درمیان قربت پر زور دیا۔ انہوں نے کہا کہ آج ہم دنیا میں جو تبدیلیاں دیکھ رہے ہیں وہ ہماری پالیسیوں اور مختلف ممالک کے تئیں ہمارے نقطہ نظر کو متاثر کرتی ہے۔ ہم عالمی تزویراتی منظر نامے میں بڑی اتار چڑھاؤ کے ساتھ تبدیلیاں دیکھ رہے ہیں، جو ہندوستان اور یورپی یونین اور ہندوستان اور جرمنی کو ایک دوسرے کے ساتھ زیادہ قریب سے کام کرنے کی مضبوط بنیاد فراہم کرتا ہے۔

اس دوران وزیر خارجہ نے امید ظاہر کی کہ EU-India FTA جلد مکمل ہو جائے گا۔ جے شنکر نے کہا کہ یہ ہمارے باہمی مفاد میں ہے کہ ہم ٹیرف کو کم کریں اور اپنے تجارتی اور اقتصادی تعاون کو بڑھانے کے دوسرے طریقے تلاش کریں۔ آج کے ماحول میں یہ کوششیں اور بھی اہم ہو جاتی ہیں۔ ہم چاہتے ہیں کہ آزاد تجارتی معاہدے (ایف ٹی اے) پر مذاکرات کا ایک اور دور جلد شروع ہو۔ ہم چاہتے ہیں کہ یہ آنے والے دنوں میں کسی فیصلہ کن نتیجے پر پہنچے اور ہمیں یقین ہے کہ یہ ہمارے باہمی مفاد میں ہوگا۔ اس سے عالمی معیشت کو مستحکم کرنے میں مدد ملے گی۔ جرمن وزیر خارجہ واڈے فل نے وزیر خارجہ جے شنکر کو یقین دلایا کہ جرمنی ہندوستان-یورپی یونین آزاد تجارتی معاہدے (ایف ٹی اے) کی مکمل حمایت کرے گا۔

جے شنکر نے دہشت گردی کے خلاف ہندوستان کی لڑائی کے بارے میں جرمنی کی سمجھ کی تعریف کی اور ہندوستان کے اپنے دفاع کے حق کے لئے واڈے فل کی واضح حمایت کی تعریف کی۔ جے شنکر نے کہا، ہم دہشت گردی کے خلاف ہندوستان کی لڑائی کے بارے میں جرمنی کی طرف سے دکھائی گئی سمجھ بوجھ کی بہت تعریف کرتے ہیں۔ جرمن وزیر خارجہ واڈے فل نے خود دہشت گردانہ حملوں سے اپنے دفاع کے ہمارے حق کے بارے میں واضح طور پر بات کی ہے۔ آپریشن سندور کے بعد ہمارے پارلیمانی وفد کا بھی پرتپاک استقبال کیا گیا۔

اس کے علاوہ جرمن فوسٹر کیئر میں مقیم اریحہ شاہ کا معاملہ بھی بات چیت میں آیا اور وزیر خارجہ نے لڑکی کے ثقافتی حقوق کے تحفظ کے لیے حل نکالنے پر زور دیا۔ جے شنکر نے کہا، میں نے وزیر سے کہا کہ یہ ضروری ہے کہ اس کے (اریحہ شاہ) کے ثقافتی حقوق کو یقینی بنایا جائے اور وہ ہندوستانی ماحول میں پروان چڑھے۔ اس لیے اس معاملے کو بغیر کسی تاخیر کے حل کیا جانا چاہیے۔

وزیر خارجہ نے کہا کہ آب و ہوا اور توانائی کے شعبے میں ہم گزشتہ چند سالوں سے سبز اور پائیدار ترقیاتی شراکت داری (گرین اینڈ سسٹین ایبل ڈیولپمنٹ پارٹنرشپ) پر کام کر رہے ہیں۔ اس میں ناگپور میٹرو ریل، پانچ ریاستوں میں گرین انرجی کوریڈورز اور کوچی میں انٹیگریٹڈ واٹر ٹرانسپورٹ پروجیکٹ شامل ہے۔ سیمی کنڈکٹر مینوفیکچرنگ سیکٹر واقعی ایک خاص امید افزا شعبے کے طور پر ابھرا ہے۔ ہم جی سی سی میں جرمن سرمایہ کاری اور ہندوستانی ٹیلنٹ اور جرمنی کی اپنی بڑھتی ہوئی صلاحیتوں کا خیرمقدم کرتے ہیں۔

انہوں نے کہا کہ جرمنی کی طرف سے تیار کردہ ٹیلنٹ کی تیاری اور بہاؤ کا ماڈل خاصا موثر رہا ہے۔ ہم نے ابھی اپنے سائنسی تعاون کے 50 سال مکمل کیے ہیں۔ اسے مزید گہرا کرنا اور اسے صنعت سے جوڑنا وہ کام ہے جو ہم نے خود طے کیا ہے۔ ہمارے سائبر اور ڈیجیٹل ڈائیلاگ بھی اہم ہیں۔ دونوں ممالک کے درمیان خلائی تعاون کو فعال طور پر تلاش کرنے کی ضرورت ہے۔

---------------

ہندوستان سماچار / عبدالسلام صدیقی