نئی دہلی، 3 ستمبر (ہ س)۔ دہلی یونیورسٹی اسٹوڈنٹس یونین (ڈی یو ایس یو) کے انتخابات کے درمیان، نیشنل اسٹوڈنٹس یونین آف انڈیا (این ایس یو آئی) نے بدھ کو دہلی یونیورسٹی کی آرٹس فیکلٹی میں ہم بدلیں گے ڈی یو کے نعرے کے ساتھ سیو ڈی یو مارچ کا انعقاد کیا۔ اس کی قیادت این ایس یو آئی کے قومی صدر ورون چودھری نے کی۔ ڈی یو کے طلباء نے اس مارچ میں شرکت کی اور تمام طلباء کے لیے وقار، مساوات اور مواقع کا مطالبہ کیا۔

طلبہ سے خطاب کرتے ہوئے این ایس یو آئی کے قومی صدر ورون چودھری نے کہا کہ دہلی یونیورسٹی تمام طلبہ کے لیے وقار، مساوات اور مواقع کی مستحق ہے۔ این ایس یو آئی ماہواری کی چھٹی، محفوظ کیمپس، سستا ہاسٹل اور منصفانہ اسکالرشپ کے مسائل پر مضبوطی سے کھڑا ہے۔ انہوں نے کہا کہ یہ لڑائی اس وقت تک جاری رہے گی جب تک دہلی یونیورسٹی میں احترام اور انصاف کا ماحول نہیں بن جاتا اور کوئی طالب علم پیچھے نہیں رہتا۔

دہلی یونیورسٹی کے لیے این ایس یو آئی کے مطالبات کا چارٹر یہ ہیں: فی سمسٹر میں ماہواری کی 12 دن کی چھٹی، تمام طلبہ کے لیے بہتر انفراسٹرکچر اور سہولیات، سبھی کے لیے مناسب ہاسٹل، ایس سی-ایس ٹی اور او بی سی ریزرویشن کے ساتھ، مستحق طلبہ کے لیے اسکالرشپ اور فیلوشپ، طلبہ کے لیے مفت میٹرو پاس، عالمی معیار کی کھیلوں کی سہولیات اور تشدد سے پاک کیمپس۔

ورون چودھری نے کہا کہ این ایس یو آئی کی زیر قیادت ڈی یو ایس یو ٹیم نے اپنے دور میں بہترین کام کیا ہے۔ این ایس یو آئی نے پنجاب یونیورسٹی میں ماہواری کی چھٹی کو کامیابی کے ساتھ نافذ کیا اور اب اسے دہلی یونیورسٹی میں بھی لاگو کرنے کے لیے پرعزم ہے۔ اس کے ساتھ ہی انہوں نے آئندہ ڈی یو ایس یو انتخابات میں این ایس یو آئی کی جیت کا دعویٰ کیا۔

---------------

ہندوستان سماچار / عبدالسلام صدیقی