کولکاتہ، 04 جون (ہ س)۔ جنوبی کولکاتہ کے سنتوش پور علاقے میں جینز واش فیکٹری میں موبائل چوری کے شبہ میں 14 سالہ لڑکے کے ساتھ کی گئی بربریت پر شمالی دیناج پور کے اسلام پور میں لوگوں کاغصہ پھوٹ پڑا ہے۔ لڑکے کے اہل خانہ اور مقامی لوگوں نے بدھ کو اسلام پور اسٹیٹ روڈ بلاک کرکے احتجاج کیا۔ سڑک پر ٹائر جلائے گئے جس کی وجہ سے ٹریفک مکمل طور پر ٹھپ ہو کر رہ گئی۔ صورتحال پر قابو پانے کے لیے پولیس کو موقع پر پہنچنا پڑا۔

بتایا جاتا ہے کہ اسلام پور کا رہنے والا متاثرہ نوجوان تقریباً ڈیڑھ ماہ قبل اپنے بڑے بھائی کے ساتھ سنتوش پور کی ایک فیکٹری میں کام کرنے گیا تھا۔ نابالغ ہونے کے باوجود نوجوان کو ملازمت دینا پہلے ہی زیربحث تھا۔ الزام ہے کہ نوجوان پر فیکٹری میں موبائل فون چوری کا جھوٹا الزام لگایا گیا اور اسے تشدد کا نشانہ بنایا گیا۔اہل خانہ کا الزام ہے کہ نوجوان کے ہاتھ پیر بندھے ہوئے تھے اور اسے الٹا لٹکا کر بجلی کا جھٹکا دیا گیا تھا۔ ان کے جسم پر زخموں کے بہت سے نشانات ہیں۔ اس واقعے کی ویڈیو بھی سوشل میڈیا پر وائرل ہو گئی ہے، تاہم آزادانہ طور پر اس کی تصدیق نہیں ہو سکی ہے۔

واقعہ کے منظر عام پر آنے کے بعد نوجوان کے اہل خانہ نے منگل کی رات ہی مقامی تھانے میں تحریری شکایت درج کرائی۔ بدھ کی صبح جیسے ہی یہ خبر علاقے میں پھیلی لوگ بڑی تعداد میں سڑک پر نکل آئے۔ متاثرہ کے والدین اور دیگر اہل خانہ نے سڑک پر لیٹ کر احتجاج شروع کر دیا۔ ان کا مطالبہ ہے کہ نوجوان کو جلد از جلد اہل خانہ کے پاس لایا جائے اور مجرموں کو سخت سے سخت سزا دی جائے۔اسلام پور کے سپرنٹنڈنٹ آف پولیس جوبی تھامس نے کہا کہ ڈائمنڈ ہاربر پولیس سے رابطہ کیا گیا ہے اور تحقیقات جاری ہیں۔ اسلام پور تھانہ پٹاگوڑا فادی کی پولیس ٹیم نے موقع پر پہنچ کر مظاہرین سے بات چیت کی اور حالات کو قابو میں کیا۔دریں اثنا، کولکاتہ کے رابندر نگر پولیس اسٹیشن نے، جو کیس کی تحقیقات کر رہی ہے، نے کارروائی کرتے ہوئے فیکٹری مالک شہنشاہ کے قریبی ساتھی مصطفی کمال اور شہنشاہ کے بہنوئی توحید عالم کو گرفتار کر لیا ہے۔ دونوں کو بدھ کو عدالت میں پیش کیا گیا۔ دریں اثناءمرکزی ملزم فیکٹری مالک شہنشاہ پیر سے مفرور ہے۔ اس کی تلاش میں چھاپے مارے جا رہے ہیں اور سی سی ٹی وی فوٹیج کی بھی جانچ کی جا رہی ہے۔

ہندوستھان سماچار

ہندوستان سماچار / Mohammad Khan