ممبئی، 23 جون (ہ س)۔ گورے گاؤں فلم سٹی میں ٹی وی کے مقبول سیریل 'انوپما' کے سیٹ پر پیر کی صبح اچانک زبردست آگ لگ گئی۔ اس واقعے میں انوپما کا سیٹ مکمل طور پر جل کر راکھ ہو گیا۔ فائر بریگیڈ کی ٹیم نے فوری طور پر موقع پر پہنچ کر آگ پر قابو پالیا۔ واقعے میں کوئی جانی نقصان نہیں ہوا۔ آرے مارگ پولیس اسٹیشن کی ٹیم موقع پر آگ لگنے کی وجہ کی جانچ کر رہی ہے۔

پولیس کے مطابق آج صبح گورے گاؤں فلم سٹی میں سیریل 'انوپما' کے سیٹ پر شوٹنگ چل رہی تھی۔ اس دوران سیریل کے سیٹ پر صبح تقریباً 5 بجے آگ لگ گئی جس سے یہاں افراتفری مچ گئی۔ آگ لگنے کی اطلاع ملتے ہی فائر بریگیڈ کی ٹیم فوری طور پر موقع پر پہنچ گئی۔ آگ پر قابو پالیا گیا ہے لیکن سیٹ مکمل طور پر جل گیا ہے جس سے پروڈیوسر کو بھاری نقصان پہنچا ہے۔

دوسری طرف آل انڈیا سینی ورکرز ایسوسی ایشن (اے آئی سی ڈبلیو اے) کے صدر سریش شیام لال گپتا نے ریاست کے وزیر اعلی دیویندر فڑنویس کو خط لکھ کر آگ کے واقعہ کی اعلیٰ سطحی تحقیقات کا مطالبہ کیا ہے۔ گپتا نے فلم سٹی کے منیجنگ ڈائریکٹر اور ممبئی لیبر کمشنر کو حفاظتی اصولوں پر عمل درآمد میں ناکامی پر فوری طور پر معطل کرنے کا بھی مطالبہ کیا ہے۔ اے آئی سی ڈبلیو اے نے الزام لگایا کہ ان کی ملی بھگت اور دانستہ لاپرواہی کی وجہ سے، پروڈیوسرز کو لازمی فائر سیفٹی پروٹوکول پر عمل کرنے پر مجبور نہیں کیا جا رہا ہے، جس سے ہزاروں کارکنوں کی زندگیاں شدید خطرے میں پڑ رہی ہیں۔ اے آئی سی ڈبلیو اے نے پروڈیوسروں، پروڈکشن ہاؤس، ٹیلی ویژن چینل کے ساتھ ساتھ فلم سٹی کے منیجنگ ڈائریکٹر اور لیبر کمشنر کے خلاف مجرمانہ ایف آئی آر درج کرنے اور یہ جاننے کے لیے مکمل تحقیقات کا مطالبہ کیا ہے کہ آیا آگ پروڈیوسروں نے جان بوجھ کر لگائی یا چینل نے انشورنس کا دعویٰ کرنے کے لیے اسے غیر قانونی طور پر استعمال کیا۔

قابل ذکر ہے کہ 'انوپما' ایک مقبول ٹی وی سیریل ہے، جسے ملک بھر میں لاکھوں لوگ دیکھتے ہیں۔ یہ واقعہ شو کے آئندہ شوٹنگ شیڈول کو متاثر کر سکتا ہے۔

---------------

ہندوستان سماچار / عبدالسلام صدیقی