نئی دہلی، یکم جون (ہ س)۔ اس سال مئی کے مہینے میں جی ایس ٹی کی وصولی سالانہ بنیادوں پر 16.40 فیصد بڑھ کر 2.01 لاکھ کروڑ روپے سے زیادہ ہوگئی ہے۔ تاہم اپریل کے مقابلے ماہانہ بنیادوں پر جی ایس ٹی کی وصولی میں کمی آئی ہے۔ اپریل میں ملک میں جی ایس ٹی کی وصولی 2.37 لاکھ کروڑ روپے کی بلند ترین سطح پر پہنچ گئی۔

حکومت کی طرف سے جی ایس ٹی پورٹل پر جاری کردہ اعداد و شمار کے مطابق، گزشتہ سال مئی کے مہینے میں کل جی ایس ٹی کی وصولی 1,72,739 کروڑ روپے تھی، جو اس سال 16.40 فیصد بڑھ کر 2.01 لاکھ کروڑ روپے ہو گئی۔ اس میں گھریلو لین دین سے تقریباً 1.50 لاکھ کروڑ روپے کی آمدنی ہوئی، جو 13.70 فیصد کا اضافہ ظاہر کرتی ہے۔ اسی طرح درآمدات سے جی ایس ٹی کی وصولی بھی 25.20 فیصد بڑھ کر 51,266 کروڑ روپے ہوگئی۔ جی ایس ٹی پورٹل پر فراہم کردہ معلومات کے مطابق مئی میں کل مرکزی جی ایس ٹی کی آمدنی 35,434 کروڑ روپے تھی۔ اسی طرح ریاستی جی ایس ٹی کی آمدنی 43,902 کروڑ روپے تھی۔ اس کے علاوہ مربوط جی ایس ٹی کی وصولی 1.09 لاکھ کروڑ روپے تھی، جب کہ سرچارج سے 12,879 کروڑ روپے کی آمدنی ہوئی تھی۔

حکومت کی طرف سے فراہم کردہ معلومات کے مطابق مغربی بنگال، مہاراشٹر، کرناٹک اور تمل ناڈو جیسی ریاستوں نے جی ایس ٹی کی وصولی میں 17 سے 25 فیصد کا اضافہ درج کیا ہے۔ دوسری طرف، ہریانہ، پنجاب، مدھیہ پردیش اور راجستھان جیسی ریاستوں میں جی ایس ٹی کی وصولی میں اوسطاً 10 فیصد اضافہ دیکھا گیا۔ اس کے علاوہ آندھرا پردیش، گجرات اور تلنگانہ جیسی ریاستوں نے جی ایس ٹی کی وصولی میں 6 فیصد کا اضافہ درج کیا ہے۔

ہندوستھان سماچار

---------------

ہندوستان سماچار / عبدالواحد