بنگلورو، 7 مئی (ہ س)۔ وزیر اعلیٰ سدارامیا نے بھی ’’آپریشن سندور‘‘ کے لیے بھارتی فوج کی تعریف کی ہے۔ انہوں نے کہا کہ ہماری سرزمین پر دہشت گردی کی کوئی جگہ نہیں ہے اور ہندوستان نے ہمیشہ پوری طاقت اور اتحاد کے ساتھ اس کا جواب دیا ہے۔ انہوں نے اس طرح کے اقدامات کے لئے کرناٹک حکومت کی طرف سے مرکزی حکومت سے ہر ممکن تعاون کا وعدہ کیا۔

انہوں نے بنگلورو میں میڈیا کو بتایا کہ ہندوستان کے پاس دہشت گردوں کے ٹھکانوں پر حملہ کرنے کے علاوہ کوئی دوسرا راستہ نہیں تھا۔ پاکستان کی طرف سے دہشت گردوں کی مسلسل حمایت کی وجہ سے ہمارے پاس کوئی چارہ نہیں بچا۔ ان حملوں سے یہ واضح پیغام ملتا ہے کہ بھارت دہشت گردی کے خلاف بڑا حملہ جاری رکھے گا۔

قبل ازیں سوشل میڈیا پلیٹ فارم ٹویٹر پر انہوں نے کہا کہ میں اپنی مسلح افواج کے حوصلے کو سلام پیش کرتا ہوں، فوج کا بہادرانہ اقدام اس بات کی تصدیق کرتا ہے کہ بھارت کسی بھی شکل میں دہشت گردی کو برداشت نہیں کرے گا۔

انہوں نے کہا، پہلگام میں دہشت گردی کا حملہ نہ صرف معصوم لوگوں پر ہوا تھا بلکہ ہندوستان کے خوابوں اور جذبات پر بھی حملہ ہوا تھا۔ ہمارے بہادر سپاہیوں کی ہر کوشش متاثرین، ان کے خاندانوں اور امن اور انسانیت پر یقین رکھنے والے ہر ہندوستانی کو انصاف فراہم کرنے کا عزم ہے۔ ہمیں فوج کی بہادری، قربانیوں اور اپنی خودمختاری کے تحفظ کے لیے ان کے غیر متزلزل عزم پر فخر ہے۔

---------------

ہندوستان سماچار / عبدالسلام صدیقی