باندھو گڑھ سے ریسکیو کرکے لائے گئے پانچ سالہ نر شیر کو صبح سویرے مادھو ٹائیگر ریزرو میں چھوڑ ا گیا

شیو پوری، 3 اپریل (ہ س)۔

مدھیہ پردیش کے شیو پوری ضلع میں واقع مادھو نیشنل پارک کو ٹائیگر ریزرو قرار دینے کے بعد اب یہاں شیر لانے کا عمل بھی شروع ہو گیا ہے۔ باندھو گڑھ ٹائیگر ریزرو سے لائے گئے ایک نر شیر کو جمعرات کی صبح 5 بجے مادھو ٹائیگر ریزرو میں چھوڑا گیا۔ اس شیر کی عمر تقریباً پانچ سال ہے۔ چونکہ کچھ دن پہلے اسی مادھو ریزرو ایریا میں ایک مادہ شیرنی کو بھی چھوڑا گیا تھا اور اب نر ٹائیگر کی آمد کے بعد ان کا جوڑا بن جائے گا۔ اس کے ساتھ ہی مادھو نیشنل پارک میں شیروں کی تعداد اب سات ہو گئی ہے۔

اس شیر کو سیلنگ کلب کے علاقے میں چھوڑا گیا۔ اسی مقام پر 10 مارچ کو وزیر اعلیٰ موہن یادو اور مرکزی وزیر جیوترادتیہ سندھیا کی موجودگی میں پنا سے لائی گئی شیرنی کو چھوڑا گیا تھا۔ ریلیز کے دوران شیو پوری کے رکن اسمبلی دیویندر جین، سی سی ایف اتم شرما، ڈی ایف او پریانشی سنگھ اور نیشنل پارک کا عملہ موجود تھا۔

قابل ذکر ہے کہ مارچ 2025 میں مادھو نیشنل پارک کو ٹائیگر ریزرو کا درجہ ملا تھا۔ 27 سال بعد یہاں شیروں نے آباد ہونا شروع کر دیا ہے۔ اس سے شیو پوری میں سیاحت کو فروغ ملے گا۔ اس سے جنگلی حیات کے تحفظ میں بھی مدد ملے گی۔ شیروں کی موجودگی نے سیاحوں میں جوش و خروش پیدا کر دیا ہے اور محکمہ جنگلات بھی اس کامیابی پر خوش ہے۔

ہندوستھان سماچار

---------------

ہندوستان سماچار / انظر حسن