فتح آباد، 30 مارچ (ہ س)۔ جی ایس ٹی ایمنسٹی اسکیم مرکزی حکومت کی طرف سے شروع کی گئی ہے تاکہ اہل ٹیکس دہندگان کو بقایا ٹیکس پر سود اور جرمانے کی مد میں راحت ملے۔ اس اسکیم کو ہریانہ حکومت نے بھی نافذ کیا ہے۔ ڈپٹی کمشنر مندیپ کور نے اتوار کو متعلقہ محکمہ کے افسران کو ہدایت دی کہ وہ اس اسکیم کے بارے میں تمام اہل ٹیکس دہندگان تک معلومات فراہم کریں تاکہ زیادہ سے زیادہ ٹیکس دہندگان اس کے فوائد حاصل کرسکیں۔ اس اسکیم سے فائدہ اٹھانے کی آخری تاریخ 31 مارچ مقرر کی گئی ہے۔

انہوں نے کہا کہ یہ اسکیم ان ٹیکس دہندگان پر لاگو ہوگی جن کے پاس مالی سال 18-2017، 19-2018 اور 20-2019 کے دوران ہریانہ جی ایس ٹی ایکٹ 2017 کی دفعہ 73 کے تحت بقایا ذمہ داری ہے۔ اس سکیم کے تحت اہل ٹیکس دہندگان کو بقایا ٹیکس پر سود اور جرمانے میں ریلیف دیا جائے گا، جس سے ان کی مجموعی ٹیکس ذمہ داری میں کمی آئے گی۔ ٹیکس دہندگان کو صرف بقایا ٹیکس ادا کرنے اور سود اور جرمانے کی معافی کے لیے جی ایس ٹی پورٹل پر درخواست دینے کی ضرورت ہے۔ ڈپٹی کمشنر نے بتایا کہ ضلع میں اب تک 15 ٹیکس دہندگان نے جی ایس ٹی ایمنسٹی سکیم کا فائدہ اٹھایا ہے جس میں مالی سال 18-2017 کے دو ٹیکس دہندگان، مالی سال 19-2018 کے پانچ ٹیکس دہندگان اور مالی سال 20-2019 کے آٹھ ٹیکس دہندگان شامل ہیں۔ انہوں نے تمام اہل ٹیکس دہندگان سے اپیل کی کہ وہ بروقت اس سکیم سے فائدہ اٹھائیں اور اپنی بقایا ٹیکس واجبات کا تصفیہ کریں۔

ہندوستھان سماچار

---------------

ہندوستان سماچار / عبدالواحد