ناگپور، 28
مارچ (ہ س)۔
وزیر
اعظم نریندر مودی 30 مارچ کو ہندو کلینڈر کے پہلے دن ناگپور میں راشٹریہ سویم سیوک
سنگھ (آر ایس ایس) کے ہیڈکوارٹر کا دورہ کریں گے، جہاں وہ سنگھ کے سربراہ ڈاکٹر
موہن بھاگوت سے ملاقات کریں گے اور تنظیم کے بانی ڈاکٹر کیشو بلیرام ہیڈگیوار کو
خراج عقیدت پیش کریں گے۔ مہاراشٹر بی جے پی کے صدر چندر شیکھر باونکولے نے جمعرات
کو اس بات کی تصدیق کی۔
یہ پہلا موقع ہوگا جب کوئی موجودہ وزیر اعظم ناگپور
کے ریشم باغ میں واقع آر ایس ایس ہیڈکوارٹر کا باضابطہ دورہ کرے گا۔ وزیر اعظم اس
موقع پر مودی اسپتال کی توسیعی عمارت کا سنگ بنیاد بھی رکھیں گے۔
وزیر اعظم کا یہ دورہ آر ایس ایس کی صد سالہ
تقریبات کی تیاریوں کے تناظر میں ہو رہا ہے، جو رواں سال اکتوبر میں وجے دشمی کے
موقع پر شروع ہونے جا رہی ہیں۔ اس کے علاوہ، مودی دیکشا بھومی کا بھی دورہ کریں
گے، جہاں ڈاکٹر بابا صاحب امبیڈکر نے 1956 میں اپنے ہزاروں پیروکاروں کے ساتھ بدھ
مت قبول کیا تھا۔
بی جے پی، جو نظریاتی طور پر آر ایس ایس کی رہنمائی
میں کام کرتی ہے، اس وقت ضلعی سطح سے لے کر قومی سطح تک تنظیمی انتخابات کے عمل
میں ہے۔ موجودہ بی جے پی صدر جے پی نڈا، جو جون 2024 میں مرکزی کابینہ میں شامل
کیے گئے تھے، اب تک توسیعی مدت میں دوہری ذمہ داریاں نبھا رہے ہیں۔
مودی کا ناگپور کا دورہ آر ایس ایس کے اعلیٰ ترین
پالیسی ساز ادارے، اکھل بھارتیہ پرتیندھی سبھا کی حالیہ بنگلورو میٹنگ کے بعد ہو
رہا ہے، جس میں بنگلہ دیش میں ہندوؤں پر ہونے والے مظالم پر تشویش کا
اظہار کرتے ہوئے ایک قرارداد منظور کی گئی تھی۔
ہندوستھان
سماچار
ہندوستان سماچار / نثار احمد خان
