دوحہ/غزہ پٹی، 26 مارچ (ہ س)۔ فلسطینی مزاحمتی تنظیم حماس نے خبردار کیا ہے کہ اگر اسرائیل نے غزہ کی پٹی پر حملے جاری رکھے تو وہ یرغمالیوں کو ہلاک کر دے گا۔ یرغمالیوں کو طاقت کے ذریعے رہا کرنے کا اسرائیل کا خواب پورا نہیں ہو گا۔ 'عرب نیوز' کے مطابق گروپ نے آج دوحہ میں جاری ایک بیان میں کہا کہ وہ یرغمالیوں کو قتل نہیں کرنا چاہتا۔ انہیں زندہ رکھنے کی ہر ممکن کوشش کر رہا ہے لیکن غزہ پر اسرائیل کے گرائے جانے والے بم ہر لمحہ ان کی زندگیوں کو خطرے میں ڈال رہے ہیں۔ حماس نے کہا کہ اسرائیل نے متعدد بار طاقت کے ذریعے یرغمالیوں کو واپس لینے کی کوشش کی ہے۔ ہر بار اسے اپنے لوگوں کو تابوتوں میں اٹھانا پڑا ہے۔
ادھر غزہ کی پٹی میں اسرائیل کے زمینی اور فضائی حملے جاری ہیں۔ غزہ کی پٹی میں حماس کی وزارت صحت کے مطابق گزشتہ ہفتے سے شروع ہونے والی اسرائیل کی جارحیت میں اب تک کم از کم 830 فلسطینی ہلاک ہو چکے ہیں۔ اسرائیل کے تازہ حملوں کے بعد جنگ بندی ٹوٹ گئی ہے۔
الجزیرہ نیوز چینل کے مطابق گزشتہ 24 گھنٹوں کے دوران غزہ پر اسرائیلی حملوں میں کم از کم 38 فلسطینی جاں بحق ہوئے ہیں اور ایک کی لاش ملبے سے نکالی گئی ہے۔ اسرائیل ڈیفنس فورسز (آئی ڈی ایف) بھی شام پر بمباری کر رہی ہے۔ اس بم دھماکے میں ڈیرہ میں کم از کم چھ افراد مارے گئے ہیں۔ قطر اور سعودی عرب نے اس کی مذمت کی ہے۔ دوسری جانب امریکی فوج یمن پر بمباری کر رہی ہے۔ اسرائیل نے 7 اکتوبر 2023 کو حملوں کے بعد غزہ کی پٹی پر حماس کے خلاف فوجی آپریشن شروع کیا۔ 7 اکتوبر کو حماس نے اسرائیل پر حملہ کیا، جس میں کم از کم 1,139 افراد ہلاک اور 200 سے زائد افراد کو یرغمال بنایا گیا۔
امریکی خبر رساں ادارے سی این این نے دعویٰ کیا ہے کہ شمالی غزہ میں فلسطینیوں نے حماس کے خلاف آواز اٹھانا شروع کر دی ہے۔ لوگ سڑکوں پر نکل آئے ہیں۔ سوشل میڈیا پر شیئر کیے گئے ایک پیغام میں بدھ کو غزہ میں حماس کے خلاف نو مظاہروں کی اپیل کی گئی ہے۔ 2006 میں انتخابات اور الفتح کے ساتھ ایک مختصر خانہ جنگی کے بعد غزہ 2007 سے حماس کے کنٹرول میں ہے۔ سترہ ماہ کی جنگ نے غزہ کا بیشتر حصہ ملبے کے ڈھیر میں تبدیل کر دیا ہے۔ این بی سی نیوز چینل کے مطابق یہ پہلا موقع ہے جب غزہ کے عوام حماس کے خلاف متحرک ہوئے ہیں۔
ہندوستھان سماچار
---------------
ہندوستان سماچار / عبدالواحد
