- انڈیگو کے اعلیٰ حکام کو ڈی جی سی اے کی طرف سے تشکیل دی گئی ایک اعلیٰ سطحی کمیٹی نے طلب کیا

نئی دہلی، 08 دسمبر (ہ س)۔ ملک کی سب سے بڑی ایئر لائن کمپنی انڈیگونے گزشتہ ایک ہفتے سے متاثر اپنے آپریشنل بحران کو حل کرتے ہوئے اپنی خدمات کو پھر سے بحال کر دیا۔ کمپنی نے آج 500 پروازیں منسوخ کیں، جبکہ ملک بھر کے پورے نیٹ ورک میں 1,800 سے زائد پروازیں شروع ہو گئی ہیں۔ایئر لائن نے کل 9000 بیگ میں سے 4500 بیگ مسافروں کے حوالے کر دیے۔ بقیہ بیگ اگلے 36 گھنٹوں میں مسافروں کو دے دیے جائیں گے۔ کمپنی نے مسافروں کو 827 کروڑ روپے واپس کیے ہیں۔ اس دوران ،ڈی جی سی اے کی طرف سے بنائی گئی اعلیٰ سطحی کمیٹی نے انڈیگو کے اعلیٰ حکام کو طلب کیا ہے۔

آج ایک بیان میں، ایئر لائن نے حالیہ رکاوٹوں کے بعد اپنے نیٹ ورک میں نمایاں بہتری کا دعویٰ کیا۔ کمپنی 1800 سے زیادہ پروازیں چلانے کے لیے پوری طرح تیار ہے، جس سےتمام آپریشنل اسٹیشن کنیکٹ ہو جا ئیں گے ۔ کمپنی نے بتایاکہ ’’ہم نے اپنے تمام آپریشنز کو آپٹیمائز کیا ہے اور صارفین کو پہلے سے بتائی جانے والی منسوخیوں کی تعداد کو کم کرنے میں کامیاب رہے ہیںاور ہماری بروقت کارکردگی (اوٹی پی )پورے نیٹ ورک میں 91 فیصد تک بہتر ہو گئی ہے۔‘‘

انڈیگونے یہ بھی کہا کہ پرواز کی منسوخی، رقم کی واپسی، سامان کی ترسیل اور دوبارہ بکنگ جیسے تمام عمل کو تیز کر دیا گیا ہے۔ کمپنی نے اب تک مسافروں کو 827 کروڑ روپے واپس کیے ہیں، باقی رقم کی واپسی عمل میں ہے۔ ایئر لائن نے کہا کہ 1 سے 7 دسمبر کے درمیان پھنسے ہوئے مسافروں کو ہوٹل میں رہائش، کیبس اور سامان کی ترسیل فراہم کی گئی تھی۔ انڈیگو نے کہا کہ تندہی سے کام کرنے سے، وہ اگلے 24 سے 36 گھنٹوں کے اندر مکمل معمول پر آنے کی توقع رکھتا ہے۔

انڈیگو کے ترجمان نے کہا،’’ https://www.goindigo.in/check-flight.status.html پر تازہ ترین فلائٹ اسٹیٹس چیک کریں۔ رقم کی واپسی کی امداد https://www.goindigo.in/refund.html پر یا ہماری کسٹمر سپورٹ سروس کے ذریعے دستیاب ہے۔ ہمیں اس رکاوٹ پر افسوس ہے اور اپنے تمام صارفین سے مخلصانہ معذرت خواہ ہیں۔ ترجمان نے مزید کہاکہ ہم اس بات کا اعادہ کرنا چاہیں گے کہ ہمارے تمام آپریشنز ایف ڈی ٹی ایل کے ضوابط اور حفاظتی پروٹوکول کی پوری طرح تعمیل کرتے ہیں، جیسا کہ وہ گزشتہ دو دہائیوں سے کرتے ہیں۔ ہم معمول کے آپریشنز کو بحال کرنے کے لیے حکام کے ساتھ مکمل تعاون کے ساتھ کام جاری رکھیں گے۔ ایک بار پھر، ہم گزشتہ چند دنوں میں پرواز میں ہونے والی رکاوٹوں کے لیے مخلصانہ معذرت خواہ ہیں۔ ہم اپنے مسافروں کے صبر اور سمجھ کے ساتھ ساتھ اپنے ملازمین اور شراکت داروں کے غیر متزلزل عزم کے شکر گزار ہیں۔

ہندوستھان سماچار

ہندوستان سماچار / محمد شہزاد