جموں, 22 دسمبر (ہ س)۔

جموں و کشمیر کے ضلع اُدھم پور کے جنگلاتی علاقوں میں چھپے دہشت گردوں کا سراغ لگانے کے لیے سیکورٹی فورسز نے پیر کے روز تلاشی مہم کا دائرہ مزید وسیع کر دیا ہے۔ مجالتہ کے جنگلات میں شروع کیا گیا گھیراؤ اور تلاشی آپریشن اب دوسرے روز میں داخل ہو چکا ہے۔اطلاعات کے مطابق مجالتہ علاقے میں دو دہشت گردوں نے مبینہ طور پر قریبی جنگلاتی علاقے میں فرار ہونے سے قبل ایک گھر میں کھانا کھایا تھا۔ مقامی دیہاتیوں کی اطلاع پر سیکورٹی فورسز نے اتوار کے روز تلاشی کارروائی شروع کی تھی۔ دو دہشت گردوں کو پکڑنے کے لیے پیر کی صبح سرچ آپریشن کو مزید تیز کرتے ہوئے جنگلاتی علاقے میں اس کا دائرہ تقریباً دس کلومیٹر تک بڑھا دیا گیا، جس میں کھوجی کتوں اور فضائی نگرانی کی بھی مدد لی جا رہی ہے۔

حکام کے مطابق پولیس اور نیم فوجی دستوں پر مشتمل مشترکہ سرچ آپریشن مجالتہ علاقے کے چورے موٹو اور اس سے ملحقہ جنگلاتی دیہات میں جاری ہے۔ یہ علاقہ اس مقام سے تقریباً پانچ کلومیٹر مغرب میں واقع ہے جہاں اس سے قبل ایک تصادم میں ایک پولیس اہلکار شہید ہوا تھا۔

ہندوستھان سماچار

---------------

ہندوستان سماچار / محمد اصغر